वीरगञ्ज। सीमा सुरक्षा गुल्म वीरगञ्जबाट खटिएको टोलीले विशेष सूचनाका आधारमा भारतबाट अवैध रूपमा भन्सार छली चोरी पैठारी गरी राखिएको ५० लाख ९३ हजार ७ सय रुपैयाँ बराबरको सामान बरामद गरेको छ।
सशस्त्र प्रहरी नायव उपरीक्षक नरेन्द्र सिंह धामीका अनुसार वीरगञ्ज महानगरपालिका वडा नम्बर १०, आदर्शनगर क्षेत्रमा लुकाइछिपाई गोदाममा राखिएका कपडा र हार्डवेयरका सामानहरू बरामद गरिएको हो।उक्त अपरेशन सशस्त्र प्रहरीको टोलीले वीरगञ्ज भन्सार कार्यालयसँग समन्वय गरेर सञ्चालन गरेको थियो। बरामद सामग्रीलाई आवश्यक कानूनी कारबाहीका लागि वीरगञ्ज भन्सार कार्यालयमा बुझाइएको सशस्त्र प्रहरीले जनाएको छ।
सामानको प्रारम्भिक मूल्याङ्कन अनुसार बरामद कपडा र हार्डवेयरका सामग्रीहरूको कुल मूल्य ५० लाख ९३ हजार ७ सय रुपैयाँ बराबर रहेको छ।सशस्त्र प्रहरीका अधिकारीहरूले सीमा क्षेत्रमा हुने अवैध तस्करी रोक्न निरन्तर निगरानी र विशेष सूचना संकलनमा आफूहरू सक्रिय रहेको बताएका छन्। यस प्रकारका अभियानले सीमावर्ती क्षेत्रमा तस्करी न्यूनीकरणमा मद्दत पुर्याउने अपेक्षा गरिएको छ।
