नवजनजागृति यूवा क्लब मधेस प्रदेश च्याम्पियन बन्दै एन्फा प्रेसिडेन्ट लिगका लागि छनौट
-
राजु कुशवाहा
- today१४ माघ २०८१
बारा । बाराको सिमरास्थित नवजनजागृति यूवा क्लबले मधेस प्रदेश च्याम्पियनको उपाधि जित्दै एन्फा प्रेसिडेन्ट लिगमा स्थान पक्का गरेको छ।
आइतबार महोत्तरीको जलेश्वर रंगशालामा सम्पन्न मधेस प्रदेश लिगको फाइनलमा नवजनजागृतिले सप्तरीको प्रोग्रेसिभ यूवा क्लबलाई २–० गोलले पराजित गर्दै चैत महिनामा हुने एन्फा प्रेसिडेन्ट लिगमा मधेस प्रदेशको प्रतिनिधित्व सुनिश्चित गरेको हो।नवजनजागृति यूवा क्लबले यसअघि २०८१ सालको बारा जिल्ला लिगमा च्याम्पियन बन्दै मधेस प्रदेश लिगमा बाराको प्रतिनिधित्व गरेको थियो। यो जीतसँगै नवजनजागृति क्लब पहिलो पटक एन्फा प्रेसिडेन्ट लिगमा प्रतिस्पर्धा गर्ने अवसर प्राप्त गरेको
फाइनल खेलमा नवजनजागृतिका विक्रम थोकर र अञ्जन बछारले समान १–१ गोल गरे। खेलको दोस्रो मिनेटमै विक्रम थोकरले सप्तरीविरुद्ध गोल गर्दै आफ्नो टोलीलाई अग्रता दिलाएका थिए। प्रतिस्पर्धात्मक खेलको दोस्रो हाफमा नवजनजागृतिका अञ्जन बछारले ५६औं मिनेटमा गोल गर्दै अग्रता दोब्बर बनाए।
खेलमा उत्कृष्ट प्रदर्शन गरेका नवजनजागृतिका रोहन तामांगलाई "म्यान अफ द म्याच" घोषित गरिएको थियो।प्रतियोगितामा विजेता बनेको नवजनजागृति यूवा क्लबले नगद ५० हजार रुपैयाँ पुरस्कार प्राप्त गरेको छ भने उपविजेता बनेको सप्तरीको प्रोग्रेसिभ यूवा क्लबले २५ हजार रुपैयाँ प्राप्त गरेको छ।नवजनजागृति यूवा क्लबका प्रथम उपाध्यक्ष शंकर थापाका अनुसार यो जीतले क्लबलाई थप हौसला दिएको छ र एन्फा प्रेसिडेन्ट लिगमा राम्रो प्रदर्शन गर्नका लागि तयारीलाई अझ सुदृढ बनाइने छ।
