नेशनल इन्फोटेकले ब्याटिङतर्फ आफ्नो कमजोरी प्रस्ट रूपमा देखायो ।
-
बलिराम श्रीवास्तव
- today११ माघ २०८१
वीरगञ्ज । नेपाल पत्रकार महासङ्घ, पर्सा शाखा र बार एसोसिएसनबिच पत्रकारिता र कानुनी सेवाको समन्वयमा सहयोग पुर्याउने उद्देश्यले तीन वर्षे समझदारी पत्रमा हस्ताक्षर भएको छ ।
समझदारी पत्रअनुसार बार एसोसिएसनले आफ्ना सदस्य कानुनी व्यवसायीमार्फत आर्थिक भार नपर्ने गरी पत्रकारहरूका लागि “प्रो बोनो सेवा” उपलब्ध गराउनेछ । साथै, दुवै पक्षले पत्रकार र कानुन व्यवसायीहरूको पेसागत हित प्रवर्द्धनका लागि सहकार्य गर्ने प्रतिबद्धता जनाएका छन् । समझदारीको अवधि तीन वर्षको हुने र आवश्यकता अनुसार दुवै पक्षको सहमतिमा थप गर्न सकिने उल्लेख गरिएको छ ।
सम्झौतामा नेपाल पत्रकार महासङ्घ, पर्सा शाखाका अध्यक्ष ओमप्रकाश खनाल र बार एसोसिएसनका अध्यक्ष अधिवक्ता कमल मोहन पोखरेलले हस्ताक्षर गरेका छन् । सम्झौता नेपाल पत्रकार महासङ्घ, पर्सा शाखाको सभाकक्षमा बिहीबार सम्पन्न भएको हो । सम्झौतापछि अध्यक्ष ओमप्रकाश खनालले लोकतन्त्रको रक्षा र प्रवर्द्धनका लागि पत्रकारिता र वकालत दुवै महत्त्वपूर्ण स्तम्भ भएको बताए । “विगतमा पनि हामीले लोकतन्त्र प्राप्ति र यसको संरक्षणका लागि सहकार्य गरेका थियौँ । समझदारीले दुवै क्षेत्रलाई थप सुदृढ बनाउँदै नागरिकका हकहितमा योगदान पुर्याउने विश्वास लिएका छौँ,” उनले भने । त्यसै गरी, अधिवक्ता कमल मोहन पोखरेलले पत्रकारिताले समाजमा उज्यालो ल्याउने र वकालतले अन्यायको सामना गर्ने भूमिका खेल्ने बताए ।
“समझदारीले पत्रकारहरूलाई कानुनी सहायता उपलब्ध गराउनुका साथै लोकतन्त्र, जनता, कुरीति र भ्रष्टाचारको विरुद्धमा निरन्तर लागिरहन प्रेरित गर्नेछ,” उनले भने । समझदारीले पत्रकार र कानुनी व्यवसायीहरूबिच समन्वयलाई सुदृढ गर्दै दुवै क्षेत्रको हित र समाजमा सकारात्मक प्रभाव पार्ने विश्वास गरिएको छ । साथै, पेसागत कर्तव्य पूरा गर्ने क्रममा पत्रकारहरूले भोग्नुपरेका कानुनी चुनौतीहरूको समाधानका लागि बार एसोसिएसनले साथ दिने प्रतिबद्धता जनाएको छ । सहकार्यले पर्सा जिल्लामा पत्रकार र कानुनी क्षेत्रका पेसाकर्मीहरूको सम्बन्धलाई नयाँ उचाइमा पुर्याउने अपेक्षा गरिएको छ ।
