गढीमाई बाहिनी मुख्यालय मकवानपुरका प्रमुख डिआइजी ठाडामगर सर्वोत्कृष्ट बाहिनीपतिका रूपमा सम्मानित
-
बिशाल यादब
- today१० माघ २०८१
वीरगञ्ज । सशस्त्र प्रहरी बल नेपाल नम्बर ३ गढीमाई बाहिनी मुख्यालय मकवानपुरले वर्षको सर्वोत्कृष्ट बाहिनीको उपाधि हात पारेको छ । सशस्त्र प्रहरी दिवसको अवसरमा आयोजित विशेष समारोहमा गढीमाई बाहिनी मुख्यालयका प्रमुख, सशस्त्र प्रहरी नायव महानिरीक्षक (डिआइजी) गणेश ठाडामगरलाई सम्मान गरिएको हो ।
गृहमन्त्री रमेश लेखकको हातबाट प्रदान गरिएको सम्मान गढीमाई बाहिनी मुख्यालयको उल्लेखनीय योगदानको कदर स्वरूप प्रदान गरिएको हो । सुरक्षा व्यवस्थापन, विपद् व्यवस्थापन, तथा सेवा प्रदायकका रूपमा उत्कृष्ट कार्यसम्पादन गर्दै बाहिनीले उच्च सफलता हासिल गरेको बताइएको छ । सशस्त्र प्रहरी बल प्रधान कार्यालयले गरेको केन्द्रीय निरीक्षण र योग्यता मूल्याङ्कनका आधारमा गढीमाई बाहिनी उत्कृष्ट ठहरिएको हो ।
आठ वटा बाहिनीमध्ये सर्वोत्कृष्ट ठहरिने गढीमाई बाहिनीले आफ्नो कार्यक्षमतामा बारम्बार निखार ल्याउँदै आएको छ । डिआइजी ठाडामगरको नेतृत्वले सफलता हासिल गर्न मुख्य भूमिका खेलेको बताइएको छ । डिआइजी ठाडामगर यसअघि मधेस प्रदेशका छिन्नमस्त बाहिनीको नेतृत्व गर्दा पनि प्रदेश २ उत्कृष्ट घोषित भएको थियो ।
उनको नेतृत्व क्षमता र कार्य दक्षताको कदर स्वरूप हालै एक वर्षको सेवा अवधि थप गरिएको छ । यस वर्ष विपद् व्यवस्थापन तालिम शिक्षालय कुरिनटार, नम्बर २१ गण हेडक्वार्टर दक्षिणकाली, ललितपुर, र नम्बर ३० गुल्म हेडक्वार्टर स्याङ्जालगायत इकाईहरू पनि उत्कृष्ट घोषित भएका छन् । विपद् व्यवस्थापन तालिम शिक्षालयका प्रमुख सशस्त्र प्रहरी वरिष्ठ उपरीक्षक (एसएसपी) माधवप्रसाद पौडेल, नम्बर २१ गणका गणपति एसपी सुरेन्द्रराज रञ्जित, र नम्बर ३० गुल्म हेडक्वार्टरका डिएसपी लीला भुजेलले पनि आफ्नो इकाईको उत्कृष्टताका लागि योगदान दिएका छन् ।
गढीमाई बाहिनीले भविष्यमा आफ्नो कार्यक्षेत्रलाई थप प्रभावकारी बनाउन विविध योजनाहरू अघि बढाउने बताएको छ । विपद् व्यवस्थापन, सीमा सुरक्षा, र नागरिक सेवा प्रवाहमा थप सुधार गर्दै देशको समृद्धि र सुरक्षाका लागि योगदान पुर्याउन गढीमाई बाहिनी तत्पर रहेको छ ।
सशस्त्र प्रहरी बलको उपलब्धिले सम्पूर्ण सङ्गठनलाई ऊर्जा प्रदान गरेको छ । सुरक्षाका सबै आयाममा उत्कृष्टता हासिल गर्दै सङ्गठनले राष्ट्रप्रति आफ्नो प्रतिबद्धता अझ मजबुत बनाएको छ । गृहमन्त्री लेखकले २४ औँ सशस्त्र प्रहरी दिवसको अवसरमा आयोजित कार्यक्रममा सफलताको लागि गढीमाई बाहिनीलाई बधाई दिँदै देशको सुरक्षामा यस्ता उत्कृष्ट इकाईहरूको भूमिका महत्त्वपूर्ण रहेको उल्लेख गरेका थिए ।
