रास्वपामा बढ्दो असन्तुष्टिबीच अमरेश कुमार सिंहको चीन यात्रा बढ्यो राजनीतिक चर्चा
-
रुस्तम देवान
- today२४ असार २०८३
काठमाडौँ । राष्ट्रिय स्वतन्त्र पार्टी (रास्वपा) का सांसद डा. अमरेश कुमार सिंह चार दिने भ्रमणका लागि बुधबार चीन प्रस्थान गरेका छन्।
सिंहका स्वकीय सचिव रञ्जित झाले उनी चार दिने भ्रमणका लागि चीन गएको पुष्टि गरेका छन्। उनका अनुसार सिंहसँगै अन्य तीन–चार जना सांसद पनि चीन गएका छन्।
तर भ्रमणको उद्देश्यबारे भने आफूलाई कुनै जानकारी नभएको झाले बताएका छन्। ‘उहाँ आज चार दिने भ्रमणका लागि चीन जानुभएको हो। उहाँसँगै अन्य तीन/चार जना सांसद पनि जानुभएको छ। के कार्यक्रमका लागि गएका हुन् भन्ने विषयमा जानकारी छैन,’ उनले बताएका छन्।
भ्रमण सकेर सिंह शनिबार स्वदेश फर्किने कार्यक्रम रहेको छ।
पछिल्लो समय डा. सिंह रास्वपा नेतृत्व तथा बालेन शाह नेतृत्वको सरकारप्रति असन्तुष्ट देखिँदै आएका छन्। रास्वपाको चितवनमा सम्पन्न प्रथम महाधिवेशनमा समेत उनी सहभागी भएका थिएनन्। यही पृष्ठभूमिमा उनको चीन भ्रमणलाई राजनीतिक वृत्तमा अर्थपूर्ण रूपमा हेरिएको छ। यद्यपि भ्रमणको आधिकारिक उद्देश्य सार्वजनिक नभएकाले यसबारे थप विवरण आउन बाँकी छ।
