गृहमन्त्री अर्यालले क्षमता नभएका गृहसचिव दुवाडीको जिम्मेवारी खोसिदिए
-
मो.सगिर अलि
- today७ आश्विन २०८२
काठमाडौं । गृहमन्त्री ओमप्रकाश अर्यालले गृहसचिव गोकर्णमणि दुवाडीलाई गृह मन्त्रालयबाट हटाएका छन् ।
सोमबार साँझ बसेको मन्त्रिपरिषद् बैठकले विभिन्न मन्त्रालय तथा निकायमा कार्यरत ३ सचिवहरूको सरुवा गर्ने बेला गृहसचिव दुवाडीलाई पनि हटाइएको हो । दुवाडीको कार्यसम्पादन र भूमिकामाथि टिकाटिप्पणी हुँदै आएको थियो । दुवाडीलाई गृह मन्त्रालयमा बसेर विभिन्न खालका अनियमितता गरेको आरोप लागेका बेला गृहमन्त्री अर्यालले जिम्मेवारी खोसेर गृह सचिव पदबाट हटाएका छन् । दुवाडीलाई राष्ट्रिय योजना आयोगको सचिवको जिम्मेवारीमा सरुवा गरेको छ । स्रोतका अनुसार रक्षा मन्त्रालयका सचिव रामेश्वर दंगाललाई गृह सचिवको जिम्मेवारी दिइएको छ ।
दुवाडी करिव २ महिनापछि आागमी मंसिर १० मा ५ वर्षे सचिवको कार्यकाल पूरा गरेर अनिवार्य अवकाशमा जाँदैछन् । राष्ट्रिययोजना आयोगका सचिव सुमनराज अर्याललाई रक्षा मन्त्रालयको सचिवको जिम्मेवारी दिइएको छ ।
दुवाडीलाई तत्कालीन गृहमन्त्री रमेश लेखकले राष्ट्रिय तथ्यांक कार्यालयबाट सरुवा गरेर गृह मन्त्रालयको सचिवमा ल्याएका थिए । दुवाडीले गृह सचिव पदको जिम्मेवारी गतिलोसँग गर्न नसकेका कारण जेनजी आन्दोलनका नाममा ठूलो क्षति भएको छ ।
