ओली नेतृत्वको कूटनीतिक असफलताले देशमा आन्दोलन भयो – जसपा नेपाल
-
राजु कुशवाहा
- today७ आश्विन २०८२
काठमाडौँ । जनता समाजवादी पार्टी नेपालले निवर्तमान प्रधानमन्त्री केपी शर्मा ओलीको कूटनीतिक असफलताका कारण देशमा आन्दोलनको अवस्था सिर्जना भएको निष्कर्ष निकालेको छ ।
भदौ ५ गते बसेको कार्यकारिणी समितिको बैठकले गरेको निर्णय सार्वजनिक गर्दै जसपा नेपालले ‘ओली नेतृत्वको कांग्रेस र एमाले सरकारले नेपालको भू–राजनीतिक अवस्था र छिमेकी मित्र राष्ट्रहरूप्रतिको संवेदनशीलतालाई बुुझ्न नसक्नु कूटनीतिक असफलता’ भएको ठहर गरेको हो ।
पार्टी महासचिव लालबाबु राउतले सार्वजनिक गरेको निर्णयमा भनिएको छ, ‘लोकतन्त्रको स्थान दलतन्त्र, नेतातन्त्र र गुटतन्त्रले लिन थालेपछि मुलुकको अवस्था झन् जटिल, दिशाहीन र अन्योलपूर्ण हुन पुगेको छ । ओली नेतृत्वको कांग्रेस र एमाले सरकारले नेपालको भू–राजनीतिक अवस्था र छिमेकी मित्र राष्ट्रहरूप्रतिको संवेदनशीलतालाई बुुझ्न नसक्नु कूटनीतिक असफलता हो ।’
साथै ओली नेतृत्वको सरकारको सामाजिक सञ्जाल बन्द गर्ने निर्णय लोकतन्त्र र व्यक्ति स्वतन्त्रताको प्रतिकूल रहेको उल्लेख गर्दै जसपा नेपालले युवा आक्रोशित भएका उल्लेख गरेको छ । र त्यसैको नतिजा २३ र २४ को आन्दोलन भएको ठहर गरिको छ ।
कांग्रेस र कम्युनिष्ट सारकारकै समय देशमा महँगी, गरिबी, बेरोजगारी, भ्रष्टाचार, लुटतन्त्र, बिचौलियाको चलखेल व्यापक रूपमा फैलिएको उल्लेख गर्दै महासचिव राउतले जनतामा सरकार, राजनीतिक दल र नेतृत्व वर्गप्रति नै व्यापक असन्तुष्टि फैलिएको बताएका छन् ।
कांग्रेस–कम्युनिष्ट सरकारकै पालामा एनसेल, वाइडबडी, यती, ओम्नी, बुढीगण्डकी, सुनकाण्डलगायत थुप्रै भ्रष्टाचारका काण्डहरू चर्चामा आएकाले जनतामा असन्तुष्टि बढेको र त्यसकै परिणाम अहिले देखिएको पनि जसपा नेपालले निष्कर्ष निकालेको छ ।
जेनजीका पुस्ताका माग आफ्नो पार्टीले पहिल्यैदेखि उठाउँदै आएको पनि महासचिव राउतले दाबी गरेका छन् । माग र मुद्दा मिल्दोजुल्दो भएकाले पार्टीले ती माग र मुद्दा सम्बोधन गराउन आवश्यक प्रयास पनि गरिरहने प्रतिबद्धता जनाएका छन् ।
