विशेष महाधिवेशनमा जाने प्रचण्डको प्रस्तावले नेकपासँग एकता अन्योलमा
-
बिशाल यादब
- today७ आश्विन २०८२
काठमाडौँ । नेकपा माओवादी केन्द्र र नेत्रविक्रम चन्द विप्लव नेतृत्वको नेपाल कम्युनिस्ट पार्टीबिच हुने भनिएको एकता सम्बन्धमा अन्योलता देखिएको छ ।
असोज ५ गते बसेको माओवादीको पदाधिकारी बैठकमा अध्यक्ष पुष्पकमल दाहाल प्रचण्डले केन्द्रीय समिति विघटन गरी मंसिरमा विशेष महाधिवेशन गर्ने प्रस्ताव राखेपछि एकता प्रक्रिया अन्योल देखिएको हो ।
भदौ २३ र २४ गते जेनजीको विद्रोहका कारण राजनीति नै उथलपुथल भएपछि प्रचण्डले नयाँ शिराबाट पार्टी पुनर्गठन गर्नुपर्ने प्रस्ताव गरेका थिए ।
प्रचण्डको प्रस्तावलाई बुधबार बस्ने स्थायी समिति बैठकले अन्तिम रूप दिनेछ । बिहीबार केन्द्रीय समिति बैठकमा पेस हुनेछ । यद्यपि केन्द्रीय समिति विघटन भएपनि नेकपा लगायत कम्युनिस्ट घटकसँग एकता गर्ने निर्णय प्रभावित नहुने उपमहासचिव हरिबोल गजुरेलले बताएका छन् ।
‘केन्द्रीय समितिलाई आयोजक समितिमा रूपान्तरण गरेपनि एकता प्रक्रिया प्रभावित हुँदैन । जेनजी विद्रोहपछि देशमा विशेष परिस्थिति देखा परेको छ । उनीहरूको भावनालाई समेत सम्बोधन हुने गरी विशेष महाधिवेशनमा जाने प्रस्ताव आएको हो’, उनले भने, ‘यही कारणले एकता प्रक्रिया अवरोध हुने म ठान्दिन । दुवै पक्ष तयार भएका महाधिवेशनअघि पनि एकता हुनसक्छ । एकता महाधिवेशन अहिले सम्भव छैन । अहिले सम्भव नभए महाधिवेशनपछि पनि अगाडि बढाउन सकिन्छ ।’
साउन १९ गते सम्पन्न माओवादीको स्थायी समिति बैठकले नेकपा लगायत विचार मिल्ने कम्युनिस्ट घटकसँग एकता गर्ने निर्णय गरेको थियो । पछिल्लो पदाधिकारी बैठकमा नेतृत्वले पद छोड्नुपर्ने दबाब बढिरहेको बेला पार्टी एकता सङ्कटमा परेको छ ।
यता नेकपाले प्रवक्ता खड्गबहादुर विश्वकर्माको नेतृत्वमा तीन सदस्य वार्ता टोली गठन गरिसकेको छ । भदौ २३ देखि २६ सम्म बसेको केन्द्रीय समिति बैठकले माओवादी लगायत अन्य कम्युनिस्ट घटकसँग एकता गर्ने निर्णय गरेको थियो ।
आगामी फागुनमा पार्टीको महाधिवेशन गर्ने निर्णय गरेको विश्वकर्माले जानकारी दिए । माओवादी विशेष महाधिवेशनमा जाने प्रस्ताव उनीहरूको आन्तरिक विषय भएको भन्दै त्यसले एकतामा कुनै प्रभाव नपर्ने बताए ।
‘हामीले माओवादीसँग मात्र एकता गर्ने भनिएको होइन । नयाँ अध्यायबाट नेकपाकै नेतृत्वमा कम्युनिस्ट केन्द्र बनाउने निर्णय भएको हो । महाधिवेशनमा जाने उनीहरूको आन्तरिक विषय हो । तत्काल पार्टी एकताको सम्भावना देखिँदैन’, उनले भने ।
विश्वकर्माले पनि एकता महाधिवेशन सम्भव नभएको बताएका छन् । नेकपा आफै महाधिवेशनमा जाने भनिएकाले एकता महाधिवेशन सम्भावना नभएको जिकिर गरे ।
यद्यपि माओवादी नेतृत्वले आफूहरू विशेष महाधिवेशनमा जान लागिएको जानकारी गराएको र त्यसका लागि शुभकामना दिएको उनले बताए ।
