मधेसका मुख्यमन्त्री सिंहविरुद्ध अनुशासनको कारबाही सिफारिसको तयारी
-
बिशाल यादब
- today२ आश्विन २०८२
जनकपुरधाम- मधेस प्रदेशका मुख्यमन्त्री सतिशकुमार सिंहले पदबाट राजीनामा नदिँदा जनमत पार्टीले उनलाई अनुशासनको कारबाही गर्न सिफारिस गर्ने तयारी गरेको छ।
जनमत पार्टी मधेस प्रदेशको संसदीय दलले मुख्यमन्त्री सिंहलाई अनुशासनको कारबाही गर्न पार्टीको केन्द्रीय समितिलाई सिफारिस गर्न लागेको हो।
संसदीय दलका नेता महेशप्रसाद यादवका अनुसार मुख्यमन्त्री सिंहसँग २४ घण्टे स्पष्टीकरण मागिएको थियो, तर उनले जवाफ दिएका छैनन्।
जेनजी आन्दोलनको क्रममा पार्टीको निर्देशनअनुसार सिंहले फेसबुकमार्फत राजीनामा दिएको घोषणा गरेका थिए, तर पछि राजीनामा दिन अस्वीकार गरेपछि पार्टीले कारबाहीको बाटो अघि बढाएको हो।
संसदीय दलले मुख्यमन्त्री तथा मन्त्रीहरूलाई फिर्ता बोलाउँदै मधेस सरकारलाई दिएको समर्थन फिर्ता लिएको जानकारी प्रदेश प्रमुखको कार्यालय र प्रदेशसभा सचिवालयमा समेत पठाइसकेको छ।
