देश विधिको शासन र आवधिक निर्वाचनका आधारमा अगाडि बढाउनुपर्छ : रास्वपा
-
बिशाल यादब
- today२५ भदौ २०८२
काठमाडौं। रवि लामिछाने नेतृत्वको राष्ट्रिय स्वतन्त्र पार्टीले शान्तिपूर्ण र रचनात्मक राजनीतिको पक्षमा रहेको स्पष्ट पारेको छ।
सो दलको तर्फबाट महामन्त्री कबिन्द्र बुर्लाकोटीले आज एक विज्ञप्ति जारी गर्दै जेन जी पुस्ताको आन्दोलनका क्रममा युवा पुस्ताले व्यक्त गरेको चाहनालाई राजनीतिक रुपमा सम्बोधन गर्ने र गराउने वातावरण निर्माणमा पनि रास्वपा सचेत रहेको उल्लेख गरेका छन्।
जेनजी आन्दोलनका कारण उत्पन्न सरकारविहिनताको परिस्थिति, नेपाली सेनाको नेतृत्वमा भइरहेको सुरक्षा प्रबन्ध, नयाँ राजनीतिक कोर्ष सुरुआतका लागि भइरहेका औपचारिक तथा अनौपचारिक छलफललगायत देशको पछिल्लो अवस्थाबारे राष्ट्रिय स्वतन्त्र पार्टी गम्भीर छलफल र विश्लेषणकै क्रममा उनको भनाइ छ।
रास्वपाले नयाँ राजनीतिक कोर्षबारे पार्टीका धारणा छिट्टै सार्वजनिक गर्ने जनाएको छ । तर, नयाँ परिस्थितिमा पनि मुलुक विधिको शासन, कानूनी सर्वोच्चता, मानवअधिकार, आवधिक निर्वाचन, अभिव्यक्ति स्वतन्त्रता जस्ता लोकतन्त्रका आधारभूत मूल्य तथा मान्यता एवं राजनीतिक सहअस्तित्वकै आधारमा अगाडि बढाउनुपर्छ भन्नेमा रास्वपा दृढ रहेको उल्लेख गरिएको छ।
अबको राजनीतिक प्रक्रियालाई शान्तिपूर्ण, रचनात्मक, सहभागितामूलक र पारदर्शी बनाउन सकिएन भने परिवर्तनको चाहना दिगो रुपमा संस्थागत हुन नसक्ने रास्वपाको ठहर छ।
