यी सबै छुट्ने तर रबिलाई पटकै छुट नदिने देशको अदालतमा न्यायको घण्टी बज्छ कि राजनीतिक बाजा?
-
बिराज यादव
- today२७ श्रावण २०८२
नेपालको न्यायालय फेरि एकपटक चर्चाको केन्द्रमा छ । केही आरोपीहरू बारम्बार धरौटीमा छुट्दै छन्—कसैलाई दोस्रो, तेस्रो, चौथो मौका समेत मिलिरहेको छ । तर जब कुरा रबि लामिछाने जस्ता जनताको बीच लोकप्रिय र सशक्त आवाज भएका व्यक्तिको आउँछ, अदालतको ढोका झन् कड्किने, धरौटीको कुरा त टाढै रहने । यो न्यायको तराजु हो कि दलको चुनावी मंच? प्रश्न देशभर गुञ्जिरहेको छ ।
न्यायालयको कोठाभित्र वस्तुतः न्यायाधीश बसिरहेका छन् कि दलका कार्यकर्ता, यो बुझ्न गाह्रो भएको छ । धरौटीको नियम सबका लागि बराबर हुनुपर्ने हो—तर यहाँ न्यायको सूत्र नै फेरिएको देखिन्छ । जसलाई सत्ता मनपर्छ, ऊ सजिलै बाहिर, जसलाई सत्ता मन पर्दैन, ऊ भित्रै कैद । यस्तो दोहोरो मापदण्डले केवल अदालतको गरिमा होइन, देशकै लोकतान्त्रिक मेरुदण्डलाई कमजोर बनाइरहेको छ ।
अब समय छ—जनताले पनि प्रश्न गर्नुपर्छ, यो अदालत न्याय दिन्छ कि शक्ति देखाउँछ? यदि अदालत न्यायको मन्दिर हो भने यो मन्दिरमा सबैको पूजा समान रूपमा स्वीकार हुनुपर्छ, किनकि न्यायको आँखा अन्धो हुन्छ, दलको झण्डा हेर्ने होइन ।
