एभरेस्टलाई हराउँदै न्यु डायमण्ड सेमिफाइनलमा
-
अग्निपथ सम्बादाता
- today२५ पुष २०७९
अग्निपथ मिडिया - AGNIPATH MEDIA
काठमाडौं, २६ पुष । एभरेस्ट भलिबल क्लब बुटवललाई पराजित गर्दै साविक विजेता होङ्गान्जी न्यु डायमण्ड युथ स्पोर्ट्स क्लब समूह चरणको एक खेल बाँकी छँदै सातौ एनभिए राष्ट्रिय महिला तथा पुरुष क्लब भलिबल च्याम्पियनसिपमा महिलातर्फ सेमिफाइनलमा प्रवेश गरेको छ ।
न्यु डायमण्डले एभेरेस्टलाई हराएर लगातार दुई जितका साथ एक खेल बाँकी छँदै सेमिफाइनलमा पुग्न सफल भएको हो । डायमण्डको जितले नेपाल पुलिस क्लब पनि एक खेल अगावै सेमिफाइनलमा पुगेको छ । एभरेस्ट र नयाँ बजार सामाजिक युवा क्लब अंक विहीन हुँदै बाहिरिएको छ ।
त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा मंगलबार भएको खेलमा डायमण्डले एभरेष्टमाथि ३–० को सोझो सेटमा जित निकाल्यो । पहिलो सेटमा २५–७ ले विजयी भएको डायमण्डले दोस्रो सेट २५–१० ले आफ्नो पक्षमा पार्न सफल भयो ।
तेस्रो सेटमा नयाँ खेलाडीलाई माैका दिएकाे डायमण्डले २५–१२ खेल आफ्नो पक्षमा पार्दै जित निकाल्न सफल भयो । डायमण्डकी मिडल ब्लकर वालमिका आचार्य केल्मी प्लेयर अफ दि म्याच घोषित भइन् । उनले केल्मी नेपालबाट गिफ्ट ह्याम्पर प्राप्त गरिन् ।
यस जितसँगै डायमण्डको समूह ‘ए’ मा २ खेलबाट ६ अंक पुगेको छ । पुलिसको पनि समान २ खेलबाट ६ अंक छ । यो समूहको अनितम खेलमा डायमण्ड र पुलिस तथा एभरेष्ट र नयाँबजारबीच प्रतिस्पर्धा हुनेछ । डायमण्ड र पुलिसको विजेता समूह विजेता बन्नेछ ।
आज नै पुरुषतर्फ ४ खेलमा प्रतिस्पर्धा हुँदैछ । पुलिसविरुद्ध ढोरपाटन, न्युटनविरुद्ध गण्डकी, मणिमुकुन्दविरुद्ध दावाली तथाबुढानिलकण्ठविरुद्ध मधेशबीच खेल हुँदैछ ।
