काठमाडौंको चौथो जित
-
अग्निपथ सम्बादाता
- today१९ पुष २०७९
अग्निपथ मिडिया - AGNIPATH MEDIA
काठमाडौं , १९ पुष । नेपाल क्रिकेट संघ (क्यान) को आयोजनामा भईरहेको नेपाल टी–२० मा काठमाडौं नाईट्सले चौथो जित निकालेको छ । कीर्तिपुरस्थित त्रिवि क्रिकेट मैदानमा सुरुआतको केही समय तनावपूर्ण बनेको खेलमा काठमाडौंले विराटनगर सुपर किङ्सलाई ३४ रनले पराजित गर्यो ।
टस हुनुअघि दुवै टिमका खेलाडीहरूले आफूहरूको पारिश्रमिक नपाएको भन्दै खेल्न नमानेपछि खेल निर्धारित समयमा सुरु हुन सकेको थिएन । तर पछि क्यानका अधिकारी, अन्य प्रतिनिधि र खेलाडीबीच भोलिसम्म पारिश्रमिक दिने सहमति बनेपछि खेल सुरु भएको थियो । यद्यपि खेललाई ९ ओभरमा झारिएको थियो ।
खेलमा काठमाडौंले प्रस्तुत गरेको ९३ रनको लक्ष्य पछ्याउने क्रममा विराटनगरले ८.५ ओभरमा सबै विकेट गुमाएर ५८ रनमात्र बनाउन सक्यो ।
विराटनगरका गौरान्सु शर्माले २२ रन बनाए । यस्तै, विवेक यादवले १२ र नन्दन यादवले ११ रन बनाउनुबाहेक अन्य खेलाडीले दोहोरो अंकमा रन बनाउन सकेनन् ।
विराटनगरलाई सस्तैमा समेट्न काठमाडौंका कमलसिंह ऐरीले तीन विकेट लिए । अनिल खरेल र सुनम गौतमले समान दुई विकेट लिदा बसिर अहमेद र अभिनाश बोहराले एक–एक विकेट लिए ।
यसअघि टस जितेर ब्याटिङमा आएको काठमाडौंले निर्धारित ९ ओभरमा पाँच विकेट गुमाएर ९२ रनको योगफल खडा गरेको थियो ।
काठमाडौंका सन्दीप रजालीले ३२ रन बनाए । कप्तान ज्ञानेन्द्र मल्ल र कमलसिंह ऐरीले समान १४ रन बनाउदा एलेक्स ब्लाकले १३ रन थपे ।
विराटनगरका नन्दन यादवले तीन विकेट लिदा हुसैन तलात र केओन जोसेफले एक–एक विकेट लिए ।
जितसँगै सात खेलबाट आठ अंक जोडेको काठमाडौं तालिकाको तेस्रो स्थानमा छ । समान खेलबाट चार अंक जोडेको विराटनगर तालिकाको पाँचौ स्थानमा छ ।
