डच विंगर गाक्पो लिभरपुलमा जाने पक्का
-
अग्निपथ सम्बादाता
- today११ पुष २०७९
अग्निपथ मिडिया - AGNIPATH MEDIA
१२ पुष । इंग्लिस क्लब लिभरपुलले नेदरल्यान्ड्सका विंगर फरवार्ड कोडी गाक्पोलाई पीएसभी आइन्डहोभनबाट अनुबन्ध गर्न सहमत भएको डच क्लबले जनाएको छ ।
२३ वर्षीय गाक्पोले फिफा विश्वकप कतार २०२२ मा नेदरल्यान्ड्सलाई क्वार्टरफाइनलसम्म पु¥याउन तीन गोल गर्दै प्रभावशाली प्रदर्शन गरेका थिए ।
गाक्पोको शुल्क ४० देखि ५० मिलियन युरो हुने अपेक्षा गरिएको छ । पिएसभीले गाक्पो सम्झौता पूरा गर्न इंग्ल्यान्ड जाने यो उनीहरुको कीर्तिमानी स्थानान्तरण हुने बताएको छ ।
गाक्पो अनुबन्धमा अर्काे इंग्लिस क्लब म्यानचेस्टर युनाइटेडले चासो देखाएपनि उनी लिभरपुलसँग जोडिएको हो । पिएसभी व्यवस्थापनका अनुसार गाक्पो बक्सिङ डेमा इंग्ल्यान्ड पुग्नेछ । त्यसपछि सम्झौता हुनेछ ।
गाक्पो यो सिजन उच्च लयमा छ । पिएसभीका लागि उनले यो सिजन १४ खेलमा ९ गोलसँगै १२ असिस्ट दिएका छन् । उनले युरोपा लिगका पाँच खेलमा तीन गोल र दुई असिस्ट पनि गरेका छन् । विश्वकपमा, उनले समूह चरणमा सेनेगल, इक्वेडर र कतारविरुद्ध गोल गरेका थिए ।
लिभरपुलले सोमबार एस्टन भिल्लालाई ३–१ ले पराजित गर्दै प्रिमियर लिगको खेलमा फर्किएको छ । प्रशिक्षक योर्गेन क्लोपको टोली शीर्ष ६ मा रहेका छ ।
लिभरपुल तथा डच टोलीका डिफेन्डर भर्जिल भान डाइकले आफ्नो डच सहयात्री गाक्पो प्रतिभावान् खेलाडी रहेको बताका थिए । ‘आशा छ कि कोडीले धेरै लामो यात्रा तय गर्न सक्छ ।’ भान डाइकले कतारमा प्रतियोगिताको क्रममा भने, ‘उनी धेरै राम्रो खेलाडी हुन् । उनले के गरिरहेका छन् त्यो हामीले देख्न सक्छौं । मलाई आशा छ कि उनमा यो भन्दा पनि राम्रो गर्न सक्ने क्षमता छ ।’
