म्यानचेस्टर इएफएल कपको क्वाटरफाइनलमा
-
अग्निपथ सम्बादाता
- today६ पुष २०७९
अग्निपथ मिडिया - AGNIPATH MEDIA
एजेन्सी, ७ पुष । च्याम्पियनसिप क्लब बर्नलेमाथि सहज जित निकाल्दै म्यानचेस्टर युनाइटेड इएफएल कप अर्थात कारवाओ कपको क्वाटरफाइनलमा प्रवेश गरेको छ ।
युनाइटेडले घरेलु मैदानमा च्याम्पियनसिप क्लब बर्नलेमाथि २–० को सहज जित निकाल्दै अन्तिम आठको यात्रा तय गरेको हो । युनाइटेडकाे जितमा क्रिष्टियन एरिक्सन र मार्कस रासफर्डले गोल गरे । पहिलो र दोस्रो हाफमा समान एक गोल भएको थियो ।
ओल्ड ट्राफोर्डमा बुधबार राति भएको खेलको २७औं मिनेटमा एरिक्सनको गोलबाट सुरुवाती अग्रता लिएको थियो । उनले आरोन वान विशाखाको पासमा गोल गर्न सफल भएका थिए ।
त्यसपछि ५७औं मिनेटमा मार्कस रासफर्डले गोल गर्दै युनाइटेडको जित पक्का गरे । उनले स्कट म्याक टोमिनेको पासमा मैदानकाे मध्य भागबाट एक्लै बल अघि बढाउँदै दुई डिफेन्डरलाई बिट गर्दै सानदार गोल गर्न सफल भएका थिए । त्यसपछि थप गोल निस्कन नसक्दा युनाइटेड विजयी हुदै क्वाटरफाइनलमा पुग्न सफल भयो ।
कारवाओ कपकै अर्काे खेलमा नटिङहम फरेस्टले ब्ल्याकबर्नलाई ४–१ ले पराजित गर्दै क्वाटरफाइनलमा पुगेको छ ।नटिङहमको जितमा ब्रेनानले दुई तथा जेसे लिंगार्ड र ताइओ एओनियीले समान एक गोल गरे । ब्ल्याकबर्नका स्कट ह्वार्टनले एक गोल फर्काए ।
अर्काे खेलमा चाल्र्टनले ब्राइटनलाई टाइब्रेकरमा ४–३ ले पराजित गर्दै क्वाटरफाइनलमा स्थान पक्का गरिसकेको छ । निर्धारित समयमा कुनै गोल निस्कन नसकेपछि खेल पेनाल्टीमा पुग्दा चाल्र्टनले बाजी मार्न सफल भयो ।
अब म्यानचेस्टर सिटी र लिभरपुलबीचको खेलपछि इएफएल कपको क्वाटरफाइनल समिकरण पूरा हुनेछ । यि दुईबीच आज राति प्रतिस्पर्धा हुँदैछ ।
हालसम्म लेस्टर सिटी, न्यूक्यासल युनाइटेड, साउथह्याम्टन, वल्भ्स, नटिङहम फरेस्ट, चाल्र्टन र म्यानचेस्टर युनाइटेडले क्वाटरफाइनलमा स्थन बनाइसकेको छ ।
