बस यात्रा रोकेर अर्जेन्टिनाको खेलाडीलाई हेलिकप्टरबाट लगियो
-
अग्निपथ सम्बादाता
- today५ पुष २०७९
अग्निपथ मिडिया - AGNIPATH MEDIA
६ पुस । एजेन्सी – फिफा विश्वकप कतार २०२२ को विजेता अर्जेन्टिनाले मंगलबार राजधानी ब्युनस आएर्सस्थित ओबेल्सिक क्षेत्रमा विजयी र्याली गर्ने कार्यक्रम रहेको थियो ।
समर्थकको अत्याधिक चापका कारण आठ घण्टाको र्याली बिचमा रोकेर हेलिकप्टरबाट खेलाडीलाई र्याली पूरा गराइएको थियो । ब्युनस आएर्समा झन्डै ४० लाख समर्थक उपस्थित भएपछि सुरक्षा व्यवस्था मिलाउन हम्मे हम्मे परेको थियो । र्यालीमा खेलाडीलाई परिक्रमा गराएको बसमै समर्थक चढ्न खोजेपछि स्थिति नियन्त्रण गर्न हेलिकप्टरबाट सहर परिक्रमा गराउनुपरेको थियो ।
अर्जेन्टिनाले विश्वकपको उपाधि जितेपछि मंगलबार सार्वजनिक बिदा दिँदै उपाधिको खुसियाली मनाउने निर्णय गरेको थियो । जसका लागि देशभरबाट राजधानी बुनस आएर्समा समर्थक जम्मा भएका थिए । रातको २ बजे टोली विमानस्थलमा आउँदा नै लाखौं समर्थकले टोलीलाई पछ्याएका थिए । दिउँसो ११:४५ देखि सुरु भएको अधिकारिक विजय र्याली पनि समर्थकको चापका कारण पूरा हुन सकेको थिएन ।
अर्जेन्टिनी फुटबल संघका अध्यक्ष चिकी टापियाले खेलाडीको तर्फबाट माफी समेत मागेका थिए । ‘खेलाडीको तर्फबाट म हजारौं माफी माग्दैछु । समर्थकमाझ खुसी मनाउन नपाउँदा दुख लागेको छ,’ उनले भने ।
