अग्निपथ मिडिया - AGNIPATH MEDIA
पुस ३ गते । एजेन्सी – फिफा विश्वकप कतार २०२२ को फाइनलमा आज (आइतबार) राति साविकको विजेता फ्रान्सले उपाधिको बलियो दावेदार अर्जेन्टिनासँग खेल्दैछ ।
यो खेल नेपाली समयअनुसार राति ८ः४५ बजेपछि लुसेल आइकोनिक रंगशालमा हुनेछ । अर्जेन्टिना र फ्रान्स आइतबार राति उपाधिका लागि आमाने–सामाने हुँदा दुवै टोली तेस्रो पल्ट विश्वको च्याम्पियन बन्ने लक्ष्यमा हुनेछ ।
यो खेलमा सबैको ध्यान विश्व फुटबलका सुपर स्टार लियोनल मेस्सी र केलियन एमबाप्पेमा नै हुनेछ । दुवै फ्रान्सेली क्लब पेरिस सेन्ट जर्मेन (पिएसजी) मा व्यवसायिक खेल खेल्छन् ।
एमबाप्पे प्रेरित फ्रान्स लगातार दोस्रोपल्ट तथा समग्रमा चौथोपटक विश्वकपको फाइनलमा पुगेको टोली हो । फ्रान्स सन् १९९८ र २०१८ मा च्याम्पियन र २००६ मा उपविजेता बनेको थियो । साविकको उपविजेता फ्रान्स यसपटक पनि च्याम्पियन बन्दै उपाधि रक्षा गर्दै तेस्रो पटक च्याम्पियन बन्ने अभियानमा हुनेछ । एमबाप्पे ५ गाेलसहित गाेल्डेन बुटकाे दाैडमा पनि रहेकाे छ ।
लगातार दुई संस्करणको फाइनलमा पुग्ने टोलीमा थपिएको फ्रान्सलाई लगातार दोस्रोपटक विश्वकपको उपाधि जित्ने सुनौलो अवसर छ । यसअघि सन् १९५८ र १९६२ मा पेले र ब्राजिलपछि ६० वर्षसम्म कुनैपनि टिमले लगातार दुईपल्ट विश्वकप जित्न सकेको छैन । यसपल्ट फ्रान्सलाई त्यो अवसर छ । सन् १९५८ र १९६२ मा ब्राजिलले लगातार दुईपटक विश्वकपको उपाधि जित्दै इतिहास बनाएको थियो । २०१८ मा विश्वकप फुटबलको उपाधि जितेको फ्रान्स पनि लगातार दुईपटक विश्वकपको उपाधि जित्ने लक्ष्यमा छ ।
यसअघि सन् १९३४ र १९३८ मा इटाली, १९५८ र १९६२ मा ब्राजिल, १९७४ र १९७८ मा नेदरल्यान्ड्स, १९८६ र १९९० मा अर्जेन्टिनाले लगातार दुईपटक फाइनलमा स्थान पक्का गरेको थियो । यस्तै १९८२, १९८६ र १९९० मा जर्मनीले तथा १९९४, १९९८ र २००२ मा ब्राजिलले लगातार तीनपटक फाइनल खेलेको छ ।
अर्जेन्टिनासँग फाइनल खेल्दा फ्रान्सलाई स्वास्थ्यको चिन्ता थपिएको छ । फाइनल खेलको दुई दिन अघि फ्रान्सका खेलाडी बिरामी परेका छन् । यसैपनि प्रतियोगिता अघि नै टोलीका मुख्य खेलाडी घाइते भएपछि फ्रान्सले केहि कमजोर टोली घोषणा गरेको थियो ।
तर प्रशिक्षक डिडियर डेसच्याम्प्सले टोलीलाई पुनः एकपटक फाइनलको यात्रा तय गराएका छन् । पछिल्लोपटक उपाधि जित्दा मुख्य भूमिका निर्वाह गरेका एङ्गोलो कान्टे र पल पोग्बा टोलीमा नपर्दै घाइते भए । क्लब फुटबलमा उच्च प्रदर्शन गरिरहेका वेस्ली फोफाना, प्रेस्नेल किम्पेम्बे, माइक माइग्नन र क्रिस्टोफर एनकुन्कु पनि चोट लागेपछि विश्वकपबाट बाहिरिए ।
कतार आएपछि फरवार्ड करिम बेन्जेमाले चोट बोकेपछि फ्रान्सको विश्वकप उपाधि रक्षा गर्ने सम्भावना कमैले देखेका थिए । तर टोली लगातार जित हासिल गर्दै अघि बढ्यो । फ्रान्स अघि बढ्दै गर्दा चोटले पूर्ण रुपमा छोडेन । क्वाटरफाइनलमा इंग्ल्यान्डलाई हराएपछि टोलीमा स्वास्थ्य समस्या देखियो । सामान्य भाइरसले आक्रमण भनिएको रोगले सेमिफाइनलमा दुई खेलाडी अनुपस्थित रहे ।
मिडफिल्डर एड्रिएन राविओट र डिफेन्डर डायोट उपामेकानो सुरुवाती रोजाइमा खेलिरहेका थिए । तर सेमिफाइनलमा उनीहरु उपस्थित थिएनन् । सामान्य रुघा खोकी भनिएको यस भाइरसले खेलाडीलाई कतिसम्म असर गर्छ फ्रान्सले खुलाएको छैन । तर सेमिफाइनल गुमाएका दुई खेलाडी प्रशिक्षणमा फर्कनुले टोलीलाई सुखद सम्भावना भने देखाएको छ ।
बिहीबारको प्रशिक्षणमा विंगर किंग्सले कोमानलाई पनि उक्त भाइरसले समात्यो । शुक्रबार प्रशिक्षणमा टोलीका दुई मुख्य डिफेन्डर राफाएल भरान र इब्राहिमा कोनाटे पनि अनुपस्थित रहे । फ्रान्सले यी सबै खेलाडीलाई रोगले समातेको जनाएको छ । शुक्रबारको प्रशिक्षणमा राबिओट र उपामेकानो ठिक भएर फर्केका छन् ।
तर लेफ्ट ब्याक थियो हर्नान्डेज र मिडफिल्डर औरेलिएन चुआमेनी भने सामान्य चोटका कारण विश्राममा थिए । शनिबार उनीहरु प्रशिक्षणमा फर्कने सम्भावना छ । हालसम्म फ्रान्सले कुनैपनि खेलाडी फाइनलमा अनुपस्थित हुने पक्का गरेको छैन । भारान र कोनाटेको अवस्थालाई लिएर सर्वत्र चासो छ । सेमिफाइनलमा सेन्टर डिफेन्स सम्हालेका यी दुई खेलाडीको अनुपस्थितिले फ्रान्सलाई फाइनलमा निकै कठिन हुनेछ ।
यता, पहिलो खेलमा साउदी अरेबियासँग २–१ को अप्रत्याशित हार ब्यहोरेको अर्जेन्टिनाले त्यसपछि उत्कृष्ट प्रदर्शन गर्दै फाइनलमा पुग्न सफल भएको छ । कप्तान लियोनल मेस्सी अर्जेन्टिनालाई कतार विश्वकपको उपाधि दिलाउँदै आफ्नो खेल जीवनलाई सुखद अन्त्य गर्न चाहन्छन् । त्यसैले पनि अर्जेन्टिना र मेस्सीका लागि यो फाइनल खेल धेरै अर्थपूर्ण छ । अर्जेन्टिनाको यो पाँचौं फाइनल हुनेछ । यता, दुईपटक (सन् १९७८ र १९८६) को च्याम्पियन अर्जेन्टिना १९३०, १९९० र २०१४ मा उपविजेता बनेको थियो ।
सन् २०१४ मा अर्जेन्टिनालाई विश्वकप फुटबलको फाइनलमा पु¥याएका कप्तान मेस्सीलाई यो अन्तिम मौका पनि हो । अर्जेन्टिनालाई विश्वकपको उपाधि दिलाएमा सबैभन्दा सफल खेलाडी बन्नेछन् । फुटबलमा मेस्सीले जित्न नसकेको एक मात्रै उपाधि यही विश्वकप नै हो ।
३५ वर्षीय मेस्सी जसरी भए पनि अर्जेन्टिनालाई विश्वकप फुटबलको उपाधि दिलाएरै खेल जीवनबाट विश्राम लिने तयारीमा छन् । उनले यस विश्वकपको फाइनल नै आफ्नो अन्तिम विश्वकप रहेको बताइसकेका छन् ।
उनी गोल्डेन बुटका मुख्य दाबेदार पनि हुन् । उनले जारी विश्वकपमा पाँच गोल गरिसकेका छन् । सन् २००६ देखि २०२२ सम्म उनले लगातार पाँच विश्वकप खेल्दै ११ गोल गरिसकेका छन् । फ्रान्सविरुद्धको फाइनल खेलमा कप्तान मेस्सीले विश्वकपमा अर्को कीर्तिमान बनाउनेछन् ।
विश्वकपमा सर्वाधिक धेरै खेल खेल्ने खेलाडीको कीर्तिमान पनि मेस्सीको नाममा रहनेछ । यसअघि जर्मनीका म्याथ्युले विश्वकपमा २५ खेल खेल्दै कीर्तिमान बनाएका थिए । अब फ्रान्सविरुद्धको खेलसँगै उनले कुल २६ खेल पु¥याएर कीर्तिमान बनाउनेछन् ।
हेड टु हेड
विश्वकपको फाइनलमा यि दुई टोलीको पहिलो तथा समग्रमा चौथोपटक भेट हुनेछ । यसअघि यि दुई टोलीले विश्वकपको समूह चरणमा दुई पटक तथा एक पटक अन्तिम १६ मा प्रतिस्पर्धा गरेको छ । सन् १९३० मा भएको विश्वकपको समूह चरणमा अर्जेन्टिना १–० ले विजयी भएको थियो । त्यसपछि १९७८ मा पनि अर्जेन्टिनाले समूह चरणमै २–१ को जित निकालेको थियो । चार वर्षअघिको विश्वकपमा फ्रान्सले प्रि–क्वाटरफाइनलमा ४–३ को जित निकालेको थियो । यि दुई टोली हालसम्म १२ पटक भेट भएको छ । जसमा अर्जेन्टिना ६ खेलमा विजयी हुँदा ३ खेल फ्रान्सले जितेको छ । ३ खेल बराबरीमा सकिएको छ ।
अर्जेन्टिनाको फाइनल यात्रा
समूह चरण
साउदी अरेबियासँग २–१ ले पराजित
मेक्सिकोमाथि २–० को जित
पोल्यान्डमाथि २–० को जित
प्रि–क्वाटरफाइनल
अष्ट्रेलियामाथि २–१ को जित
क्वाटरफाइनल
नेदरल्यान्ड्सविरुद्धनिर्धारित समयमा २–२ गोलको बराबरीपछि पेनाल्टी सुटआउटमा ४–३ को जित
सेमिफाइनल
क्रोएसियामाथि ३–० को जित
फ्रान्सको फाइनल यात्रा
समूह चरण
अष्ट्रेलियामाथि ४–१ को जित
डेनमार्कमाथि २–१ को जित
ट्युनिसियासँग २–१ ले पराजित
प्रि–क्वाटरफाइनल
पोल्यान्डमाथि ३–१ को जित
क्वाटरफाइनल
इंग्ल्यान्डमाथि २–१ को जित
सेमिफाइनल
मोरक्कोमाथि २–० को जित
