नामिबियाविरुद्ध नेपालको संघर्षपूर्ण ‘शतक’
-
अग्निपथ सम्बादाता
- today१६ मंसिर २०७९
अग्निपथ मिडिया - Agnipath Media
आईसीसी विश्वकप लिग–२ अन्तर्गत एकदिवसीय सिरिजमा नामिबियाविरुद्ध नेपालले १ सय रन पूरा गरेको छ । नेपालले २९ ओभरमा तीन विकेटको क्षतिमा घरेलु टोली नामिबियाविरुद्ध शतक अर्थात १ सय रन पूरा गरेको हो । १ सय रन पूरा गर्दा नेपालले महत्वपूर्ण तीन विकेट गुमायो ।
नेपालले पहिलो विकेटको रूपमा विकेटकिपर अर्जुन साउँदलाई १८ रनमा गुमायो । ४२ बलको सामना गरेका उनले त्यसक्रममा दुई चौका हिर्काए । त्यस्तै, आसिफ शेखले ४६ बलमा दुई चौकाको मद्दतमा २० रन जोडे । रन आउटको सिकार भएका कप्तान रोहित पौडेलले १५ बलमा १० बनाए । नेपाल र नामिबियाबीचको खेल विन्डहोकस्थित युनाइटेड क्रिकेट क्लब मैदानमा भइरहेको छ ।
सिरिजमा नेपाल नामिबियालाई हराउँदै सुखद सुरुवात गर्न चाहन्छ । नामिबिया घरेलु मैदानको फाइदा उठाउँदै जित निकाल्ने सोचमा छ । हालसम्म नेपालले नामिबियाविरुद्ध दुई एकदिवसीय अन्तर्राष्ट्रिय म्याच खेलेको छ । जसमा नेपालले दुवै खेल हारेको छ ।
विश्वकप लिग–२ अन्तर्गत नै खेलिएको सिरिजमा नामिबियासँग नेपाल क्रमशः ४० रन र ६३ रन पराजित भएको थियो । यसपटक नेपाललाई नामिबियाविरुद्ध बदला लिने मौका छ । यदि आजको खेल जिते नामिबियाविरुद्ध नेपालले इतिहास पनि रच्नेछ । विश्वकप लिग–२ को अंक तालिकाको कुरा गर्दा नेपाल छैैटौँ स्थानमा छ ।
१७ अंक जोडेको नेपालले २० म्याच खेलेको छ । जसमा नेपालले ११ मा हार, आठमा जित र एक खेलमा अंक बाँडेको छ । त्यस्तै, २६ म्याच खेलेको नामिबिया तालिकाको चौथो स्थानमा छ । उसले २६ म्याच खेल्दा १६ मा जित र १० खेलमा हारको सामना गरेको छ । त्यस्तै, तालिकाको शीर्षमा ओमान, दोस्रोमा स्कटल्याण्ड, तेस्रोमा अमेरिका, पाँचौँमा यूएई र सातौँमा पिएनजी छ ।
