अग्निपथ मिडिया
९ मंसिर । एजेन्सी – फिफा विश्वकप कतार २०२२ अन्तरगत समूह ‘बी’ को दोस्रो चरणको खेलमा इंग्ल्यान्ड र अमेरिकाबीच प्रतिस्पर्धा हुँदैछ ।
खेल राति १२ः४५ बजेपछि अल बायत स्टेडियममा हुनेछ । पहिलो खेलमा इरानलाई ६–२ ले हराएर बलियो सुरुवात गरेको इंग्ल्यान्ड अमेरिकालाई हराउँदै लगातार दोस्रो जित निकाल्दै नकआउट चरण पुग्ने सम्भावनालाई बलियो पार्न चहान्छ ।
तर, विश्वकपमा यि दुई टोलीबीच दुईपटक प्रतिस्पर्धा हुँदा इंग्ल्यान्डले जित निकाल्न सकेको छैन । अमेरिकाले सन् १९५० मा ब्राजिलमा भएको विश्वकपमा इंग्ल्यान्डलाई १–० ले हराएको थियो । त्यसपछि २०१० को विश्वकपमा १–१ गोलको बराबरी खेलेको थियो ।
यता, पहिलो खेलमा अग्रता जोगाउन नसक्दा वेल्ससँग १–१ गोलको बराबरीमा रोकिएको अमेरिका इंग्ल्यान्डलाई स्तब्ध पार्दै समूह ‘बी’ मा नकआउट पुग्ने सम्भावना जीवितै राख्न चहान्छ ।
इंग्ल्यान्डले सन् १९८२, २००६ र २०१८ को विश्वकपमा सुरुवाती दुई खेलमै जित निकालेको इतिहास छ । इंग्ल्यान्ड २०१८ मा जस्तै समुह चरणको सुरुवाती दुई खेलमै जित निकाल्ने लक्ष्यमा हुनेछ ।
इंग्ल्यान्डले लगातार पाँचौपटक विश्वकपको समूह चरणमा कन्काफ टोलीको समाना गरिरहेको छ । २००६ मा ट्रिनिडाड एण्ड टोबागो (२–०), २०१० मा अमेरिका (१–१), २०१४ मा कोस्टा रिका (०–०) र २०१८ मा पानामा (६–१) सँग प्रतिस्पर्धा गरेको थियो ।
इंग्ल्यान्ड फिफा विश्वकपमा ऐतिहासिक १ सय गोल नजिक छ । इंग्ल्यान्डले हालसम्म विश्वकपमा ७० खेलमा ९७ गोल गरिसकेको छ ।
यता, अमेरिकाले विश्वकपको समूह चरणमा सात खेल खेल्दा एकमा मात्रै हार बेहोरेको छ । अमेरिकाले युरोपेली प्रतिद्धन्द्धीविरुद्ध समूह चरणमा ६ खेलमध्ये पाँच खेलमा बराबरीको नतिजा निकालेको छ । अमेरिकाले विश्वकपमा ३४ खेल खेल्दा ८ जित, ७ बराबरी र १९ खेलमा हार बेहोरेको छ ।
यि दुई टोलीबीच हालसम्म ११ पटक भेट हुँदा इंग्ल्यान्डले ८ खेलमा जित निकालेको छ । १ खेल बराबरीमा सकिदा दुई खेल अमेरिकाले आफ्नो पक्षमा पारेको छ । यि दुई टोलीबीच पछिल्लोपटक सन् २०१८ मा प्रतिस्पर्धा हुँदा इंग्ल्यान्डले ३–० को सहज जित हात पारेको छ ।
इंग्ल्यान्डसँग यो सिजनमा लयमा रहेका बुकायो साका र जुड बेलिंघमसँगै ह्यारी केन, जोर्डन पिकफर्ड, ह्यारी मगाएर, लुक शा, जोन स्टोन्स, काइल वाल्कर, काइरान ट्रिपिएर, डेक्लन राइस, मेसन माउन्ट फिल फोडेन, ज्याक ग्रिलिस, रहिम स्टर्लिङ र मार्कस रासफर्ड रहेकाछन् ।
यता, अमेरिकासँग म्याट टर्नर, सर्जिनो डेस्ट, वाल्कर जिम्मरम्यान, टिम रिम, एन्टोनी रबिन्सन, टाइलर एडम्स, वेस्टन मकेनी, युनुस मुसा, क्रिस्टियन पुलिसिच, जिओ रेइना, जश सार्जेन्ट र टिम वेह लगायतको खेलाडीको साथ रहेको छ ।
