टी—२० विश्वकप छनोट क्रिकेट : सिंगापुरविरुद्ध नेपालले पहिले बलिङ गर्ने
-
अनजित राउत कुर्मि
- today१२ कार्तिक २०८०
१३ कार्तिक // अग्निपथ मिडिया
सन् २०२४ मा आयोजना हुने टी-२० विश्वकप क्रिकेट प्रतियोगिताको एसियाली क्षेत्रको अन्तिम चरणको छनोट खेलमा सोमबार आयोजक राष्ट्र नेपालले सिंगापुरविरुद्ध पहिले बलिङ गर्ने भएको छ । कीर्तिपुरस्थित अन्तर्राष्ट्रिय क्रिकेट मैदानमा सिंगापुरले टस जिती पहिले ब्याटिङ गर्ने निर्णय लिएको हो ।
एसियाली क्षेत्रको अन्तिम चरणको छनोट प्रतियोगितामा आठवटा राष्ट्रको सहभागिता रहेको छ । प्रतियोगितामा नेपालसहित संयुक्त अरब इमिरेट्स (यूएई), हङ्कङ, ओमान, बहराइन, कुवेत, मलेसिया र सिंगापुरले प्रतिस्पर्धा गर्दैछन् ।
छनोट प्रतियोगिता खेलहरु कीर्तिपुरस्थित अन्तर्राष्ट्रिय क्रिकेट मैदानमा र मुलपानी क्रिकेट मैदानमा खेलाइने छ । यो प्रतियोगिताबाट दुईवटा राष्ट्र आगामी टी-२० विश्वकपमा छनोट हुनेछन् । टी-२० विश्वकपको नवौँ संस्करण सन् २०२४ मा वेस्ट इन्डिज र अमेरिकामा संयुक्त रुपमा आयोजना हुँदैछ ।
मुलपानी क्रिकेट मैदानमा खेलाइने अर्को खेलमा बहराइनले पहिले ब्याटिङ गर्ने भएको छ । उक्त खेलमा यूएईले टस जिती पहिले बलिङ गर्ने निर्णय लिएको हो । नेपाल र सिंगापुर तथा यूएई र बहराइनबिचको खेल नेपाली समय अनुसार, बिहान ९ बजे सुरु हुँदैछ ।
