सन्दीपको निलम्बन फुकुवा क्यान बोर्ड बैठकको एजेन्डा
-
अग्निपथ सम्बादाता
- today१७ माघ २०७९
माघ १७, काठमाडौं // Agnipath media
नेपाल क्रिकेट संघ (क्यान) को बोर्ड बैठक आज पोखरामा बस्दैछ । नेपाल टि२० लिग विवादपछि बस्न लागेको बोर्ड बैठकमा बलात्कार आरोप लागेका क्रिकेटर सन्दीप लामिछानेमाथि क्यानले लगाएको निलम्बन फुकुवा गर्दै राष्ट्रिय टोलीमा समावेश गर्ने एजेन्डामा छलफल हुने बताइएको छ ।
चार महिनापछि बस्न लागेको बोर्ड बैठकमा नेपाल टि२० लिग विवाद, मुख्य प्रशिक्षक नियुक्ति, सन्दीप लामिछाने निलम्बन फुकुवा, आइसिसी विश्वकप लिग २ त्रिकोणात्मक ओडिआई सिरिज आयोजना, एसिसी प्रिमियर कप आयोजना लगायत विषयमा छलफल हुँदैछ । जसमध्य सन्दीप निलम्बन फुकुवा र नेपाल टि२० लिग विवाद मुख्य एजेन्डा रहेको बताइएको छ ।
बलात्कार आरोप लागेपछि क्यानले सन्दीपलाई भदौ २३ मा निलम्बन गरेको थियो । क्यानले उक्त निलम्बन फुकुवा गर्दै राष्ट्रिय टोलीमा समावेश गर्न हतार गर्दै आएको छ । सन्दीपलाई पुष २९ मा उच्च अदालत पाटनले काठमाडौं जिल्ला अदालतको आदेश बदर गर्दै २० लाख धरौटीमा रिहा गर्न दिएको थियो । तर सन्दीप दोषी हुन् वा होइनन् भन्ने निर्णय जिल्ला अदालत काठमाडौंले दिएको छैन ।
उच्च अदालतले सन्दीपलाई विदेश जान रोक लगाएको छ । यदि सन्दीप काठमाडौं उपत्यका छाड्दा जिल्ला प्रहरी परिसर काठमाडौंलाई लिखित जवाफ दिनु पर्ने समेत जनाएको छ । काठमाडौं छाड्ने र फर्किने मितिसँगै त्यो स्थानमा रहने नाम समेत जनाउनु पर्ने हुन्छ ।
सन्दीपले क्रिकेट खेल्न पाउने वा नपाउने भन्ने अदालतको आदेशमा उल्लेख छैन । तर सन्दीप पक्षका कानुनी व्यावसायीलल उनलाई टोलीमा राख्नुपर्ने माग गरेका छन् । तर उनलाई पुर्पक्षको लागि धरौटीमा छोड्ने उच्च अदालतको आदेश बदर गर्न माग गर्दै महान्यायाधिवक्ता कार्यालय सर्वोच्च अदालत जाने भएको छ ।
भदौ ५ गते काठमाडौंको एक होटलमा लगेर नाबालिगलाई बलात्कार गरेको आरोप सन्दीपमाथि लागेको थियो । भदौ २१ गते एक नाबालिगले सन्दीपले आफूलाई पटक पटक बलात्कार गरेको भन्दै प्रहरी वृत गौशालामा किटानी जाहेरी दिएकी थिइन् । सन्दीपले असोज २० मा त्रिभुवन विमानस्थलबाट आत्मासपर्ण गरेका थिए । सन्दीपलाई सिनियर टोलीमा फर्काउन लागि परेको क्यान नेतृत्वको भने चौतर्फी आलोचना हुँदै आएको छ ।
