शीर्षस्थानको बायर्नको अर्काे बराबरी
-
अग्निपथ सम्बादाता
- today१५ माघ २०७९
Agnipath media - अग्निपथ मिडिया
१५ माघ, एजेन्सी – जर्मन बुन्डेसलिगाको शीर्षस्थानमा रहेको बायर्न म्युनिखले अर्काे बराबरीको नतिजा निकालेको छ । बायर्न घरेलु मैदानमा फ्रान्कफुर्टसँग १–१ गोलको बराबरीमा रोकिएको हो ।
१२ नोभेम्वरमा साल्केलाई २–० ले पराजित गरेयता, बायर्नले मैत्रीपूर्ण खेलसहित पछिल्लो चार खेलमा जित निकाल्न सकेको छैन । बायर्नले आरबी लाइप्जिग र कोल्नसँग समान १–१ गोलको बराबरी खेलेको छ ।
एलिएन्ज एरिना म्युनिखमा शनिबार राति भएको खेलमा बायर्नका लिरोए सानेले गोल गर्दा फ्रान्कफुर्टका रान्दल कोलो मुएनीले गोल फर्काए ।
३४औं मिनेटमा लिरोए सानेले गोल गर्दै बायर्नलाई पहिलो हाफमा १–० को अग्रता दिलाए । उनले थोमस मुलरको पासमा गोल गर्न सफल भएका थिए । तर, बायर्नले त्यो अग्रतालाई जोगाउन सकेन ।
६९औं मिनेटमा रान्दल कोलो मुएनीले गोल गर्दै खेललाई १–१ गोलको बराबरीमा ल्याए । उनले दाइची कामदाको पासलाई सदुपयोग गरेका थिए । त्यसपछि थप गोल निस्कन नसक्दा खेल बराबरीमा सकियो ।
यस बराबरीसँगै बायर्नले आफ्नो शीर्षतालाई मजवुत बनाउने मौका गुमाएको छ । शीर्षस्थानमा रहेको बायर्नको १८ खेलबाट ३७ अंक छ । समान खेलबाटै दोस्रो स्थानमा रहेको युनियन बर्लिनको ३६ अंक छ । फ्रान्कफुर्ट ३२ अंक जोडेर पाँचौ स्थानमा छ ।
