रियल म्याड्रिड कोपा डेल रेको सेमिफाइनलमा
-
अग्निपथ सम्बादाता
- today१२ माघ २०७९
अग्निपथ मिडिया-Agnipath Media
१३ माघ एजेन्सी l मड्रिड डर्वीमा अतिरिक्त समयमा जित निकाल्दै रियल म्याड्रिड स्पेनिस कोपा डेल रेको सेमिफाइनलमा प्रवेश गरेको छ ।
रियलले घरेलु मैदानमा १० खेलाडीमा समेटिएको एट्लेटिको मड्रिडमाथि ३–१ को पूनरागमन जित निकाल्दै अन्तिम चारमा स्थान पक्का गरेको हो । घरेलु मैदानमा रियलको जितमा रोड्रिगो, कप्तान करिम बेन्जेमा र भिनिसियस जुनियरले गोल गरे ।एट्लेटिकोका अल्भारो मोराटाले एक गोल गरे ।
सान्टियागो बर्नबेउमा बिहीबार राति भएको खेलको १९औं मिनेटमा मोराटाको गोलबाट रियल खेलमा पछि परेको थियो । उनले नाहुइल मोलिनाको पासमा गोल गर्न सफल भएका थिए ।
एक गोलले पछि परेको रियलले ७९औं मिनेटमा बराबरी गोल फर्काउँदै खेलमा फर्कियो । रोड्रिगोले लुका मोड्रिचको पासमा तीन डिफेन्डरलाई बिट गर्दै सुन्दर गोल गर्दै खेललाई बराबरीमा ल्याए । त्यसपछि खेल अतिरिक्त समयमा लम्बियो ।
९९औं मिनेटमा एट्लेटिको १० खेलाडीमा समेटिन पुग्यो । स्टेफन साभिच चार मिनेटको अन्तरमा दोहोरो पहेँलो कार्ड खाँदै मैदानबाट बाहिरिए । उनले एडुआर्डाे कामाभिंगालाई स्लाइडिङ च्यालेन्ज गरेका थिए ।
१०४औं मिनेटमा कप्तान बेन्जेमाले गोल गर्दै रियललाई २–१ ले अघि बढाए । मार्काे एसेन्सियोले दिएको लो क्रसलाई भिनियसले प्रहार गर्ने प्रयास गरेपनि उनको खुट्टामा लागेर गएको बललाई बेन्जेमाले सहजै गोलमा परिणत गरे ।
त्यसपछि अतिरिक्त समयको थप गरिएकोपहिलो मिनेटमा भिनिसियसले सोलो गोल गर्दै रियलको जित पक्का गरे । मैदानको मध्य भागमा रेइनेल्डोबाट ड्यानियल सेवालोसले बल खोसेपछि भिनिसियसले बल अघि बढाएर सहज गोल गर्न सफल भए ।
अर्काे क्वाटरफाइनलमा एथलेटिको बिल्वाओले भ्यालेन्सियालाई ३–१ ले पराजित गर्दै सेमिफाइनलमा स्थान पक्का गरेको छ । बिल्वाओको जितमा इकर मुनिएन, निको विलियम्स र मिकेल भेस्काले गोल गर्दा भ्यालेन्सियाले आत्मघाती गोल उपहार पाएको थियो ।
यससँगै कोपा डेल रेको सेमिफाइनल समिकरण पुरा भएको छ । यसअघि क्याटलान क्लब बार्सिलोना र ओसासुनाले सेमिफाइनलमा स्थान पक्का गरिसकेको छ ।
