राष्ट्रिय टोलीका तेज, दीनेश र गौतम अष्ट्रेलियातर्फ
-
अग्निपथ सम्बादाता
- today२ माघ २०७९
Agnipath media - अग्निपथ मिडिया
काठमाडौं,३ माघ । नेपाली राष्ट्रिय फुटबल टोलीका लागि पछिल्लो समय लगातार सुरुवाती रोजाइमा खेलिरहेका तीन खेलाडी एकसाथ मंगलबार पलायन भए । नेपाली फुटबलको वर्तमान मात्र नभएर भविष्यको रुपमा हेरिएका डिफेन्डरद्वय दीनेश राजवंशी र गौतम श्रेष्ठसँगै मिडफिल्डर तेज तामाङ सोमबार राती अष्ट्रेलिया प्रस्थान गरेका हुन् ।
अखिल नेपाल फुटबल संघ (एन्फा) र ए डिभिजन क्लबहरुबीच पटक पटक विवादका कारण लिग स्थगित भएपछि खेलाडीहरु विदेशिने क्रम पछिल्लो समय अत्याशलाग्दो अवस्थामा पुगेको छ । राष्ट्रिय टोलीमा नियमित खेल्दै आएका खेलाडीले नै पलायनको बाटो रोजेपछि घरेलु फुटबल मात्र नभएर स्तरीय राष्ट्रिय टोली निर्माण गर्न नै कठिन हुने देखिएको छ ।
नयाँ सिजनका लागि ए डिभिजन क्लबहरुले अनुबन्ध गरेको अवस्थामा पनि खेलाडी पलायन हुनुले फुटबलप्रति खेलाडीको वितृष्णा बढेको अनुमान गर्न सकिन्छ । यसअघि पनि घरेलु फुटबलको भविष्य प्रष्ट नहुँदा राष्ट्रिय टोलीबाट खेल्दै आएका खेलाडी पलायन भएका थिए । तर लिगको मिति तोक्न क्लब र एन्फाबीच निकै लामो जुहारी चल्नु र पुन: लिग २ महिना पछिलाई सर्दा खेलाडी पलायन भएका हुन् ।
पछिल्लो दुई वर्षमा डेढ दर्जनभन्दा बढी खेलाडी अष्ट्रेलिया पुगेका छन् । नेपालमा लिग फुटबल नियमित हुन नसक्दा खेलाडीले अष्ट्रेलियामा पटके प्रतियोगितासँगै नेपाली मूलका अन्य खेलाडीसँग विभिन्न क्लबमा खेल्दै आएका छन् । अष्ट्रेलियामा अर्ध व्यावसायिक फुटबलमा भने निकै कम खेलाडीले खेल्ने अवसर पाएका छन् । पूर्ण व्यावसायिक शीर्ष लिगमा भने हालसम्म कुनै नेपाली खेलाडीले खेल्न सकेका छैनन् ।
