वीरगंज मेयर र अलौंका जनताबीच उत्पन्न विवाद समाधान गर्न नेता मो. सगीर अलीको अपील
-
अग्निपथ सम्बादाता
- today२५ आश्विन २०८१
वीरगंज, असोज २५ – वीरगंज महानगरपालिका र अलौंको जनताबीच दशैंको बेला उत्पन्न भएको विवादलाई लिएर विद्यार्थी नेता सगीर अलीले मेयर राजेशमान सिंहलाई माफी माग्न र विवादलाई शीघ्र समाधान गर्न अपील गरेका छन्।
दशैंको अवसरमा अलौंका जनताबीच उत्पन्न असन्तुष्टिले स्थानीय तह र जनप्रतिनिधिबीच अविश्वासको वातावरण सिर्जना गरेको छ। यस समस्याले समुदायमा अशान्ति फैलाएको भन्दै नेताअलीले चाँडो भन्दा चाँडो वार्ताबाट समाधानको उपाय खोज्न सुझाव दिएका छन्।
विद्यार्थी नेता मो सगीर अलीले एक सार्वजनिक अपील जारी गर्दै भने, "दशैं जस्तो महत्वपूर्ण पर्वको अवसरमा यो प्रकारको विवादले हाम्रो समाजमा विभाजन ल्याउनु दुखद् हो। यो समस्या वार्ताबाट समाधान गर्नुपर्छ र मेयर सिंहले अलौंका जनतासँग माफी मागेर पुनः सद्भावको वातावरण सिर्जना गर्नुपर्छ।"
उनले जनप्रतिनिधिहरूले जनताको आवाजलाई सम्मान गर्दै समाधान खोज्नु आवश्यक रहेको औँल्याए। “मेयरज्यूले आफ्नो जिम्मेवारी स्वीकार गर्दै जनताको भावनालाई कदर गर्नुपर्छ र यस विवादलाई शान्तिपूर्ण ढंगले समाधान गर्नु पर्छ,” नेता अलीले भने।
अलीको अपीलपछि यस विषयमा प्रतिक्रिया आउन बाँकी छ, तर समुदायका धेरै सदस्यले शान्तिपूर्ण समाधानको अपेक्षा गरेका छन् ।
