देश असल अभिभावकहिन: जनगुनासो चुलियो, प्रधानमन्त्रीको भूमिकाप्रति प्रश्न उठ्यो
-
दिपक सिंह
- today१३ आश्विन २०८१
देशका नेताहरूले विदेश भ्रमण गर्दा राष्ट्रको हितका लागि छिटोभन्दा छिटो फर्किनु स्वाभाविक हो। भारतीय प्रधानमन्त्री नरेन्द्र मोदी हालै अमेरिका भ्रमण सकेर स्वदेश फर्किए।
इजरायली प्रधानमन्त्री बेन्जामिन नेतान्याहु दुई दिनमै युद्धग्रस्त आफ्नो देश फर्किए। युक्रेनका राष्ट्रपति भ्लादिमिर जेलिन्स्की, जो आफ्नै देशमा युद्धको नेतृत्व गरिरहेका छन्, उनीसमेत चार दिनमै फर्किए।
तर, हाम्रो देशका प्रधानमन्त्री केपी शर्मा ओली भने अमेरिकामा अझै बसेका छन्। यति संवेदनशील समयमा, देशमा समस्याहरूका पहाड उभिएका छन्, तर ओली कार्यकर्ता र आफन्तको घर-घरमा भ्रमण गर्दै, झण्डा फहराउँदै बसिरहेका छन्।
यो परिस्थितिले जनतामा गहिरो निराशा उत्पन्न गरेको छ। देश यतिबेला नेतृत्वविहीन भएको महसुस हुँदैछ। देशका लाखौं जनताले प्रधानमन्त्रीको विदेशमा लामो बसाइप्रति गम्भीर प्रश्न उठाइरहेका छन्।
"देश संकटमा छ, जनताको समस्या दिन प्रतिदिन बढ्दैछ, तर प्रधानमन्त्री अमेरिकामा के हेरेर बस्नुभएको छ?" भन्ने गुनासो सर्वत्र सुनिन थालेको छ। जनताले असल अभिभावकको खाँचो महसुस गरिरहेका छन्, जसले विदेशबाट पनि आफ्ना जनताको दुःख बुझ्ने र आफ्नो कर्तव्य पूरा गर्न तत्पर रहने होस्। देशको नेतृत्व भने जिम्मेवारीबाट पन्छिएजस्तो देखिँदा, यो एउटा गम्भीर राष्ट्रिय चिन्ताको विषय बनेको छ। आखिर, यस्तो कठिन समयमा, देशलाई कति समयसम्म असल अभिभावकबिनाको अवस्थाले पीडा दिन्छ?
