फेसबुक, युट्युबसहित २६ सामाजिक सञ्जाल बन्द गर्ने सरकारको निर्णय
-
मेराज हास्मी
- today१९ भदौ २०८२
सरकारले फेसबुक, इन्स्टाग्राम, युट्युब र एक्ससहित २६ वटा सामाजिक सञ्जाल बन्द गर्ने निर्णय गरेको छ।मन्त्रिपरिषदको निर्णय र सर्वोच्च अदालतको परमादेश कार्यान्वयन गर्न सञ्चार तथा सूचना प्रविधि मन्त्रालयले बिहीबार उक्त निर्णय गरेको मन्त्रालय स्रोतले जानकारी दिएको छ।सरकारले बिहीबारदेखि नै उक्त निर्णय कार्यान्वयन गर्न दूरसञ्चार प्राधिकरणलाई पत्राचार गरेको छ।
सञ्चार मन्त्रालयमा बिहीबार बसेको बैठकले सर्वोच्च अदालतको परमादेश र मन्त्रिपरिषद्को निर्णय कार्यान्वयन गर्न २६ वटा सामाजिक सञ्जाल बन्द गर्ने निर्णय गरेको स्रोतले जानकारी दिएको छ।प्रधानमन्त्री केपी ओलीका मुख्य सल्लाहकार बिष्णु रिमालले बिहीबार बिहान सामाजिक सञ्जालमा एक सामग्री पोस्ट गर्दै सरकारले सामाजिक सञ्जाल बन्द गर्नसक्ने संकेत गरेका थिए।
यसलगत्तै सञ्चार मन्त्रालयमा बसेको बैठकमा सामाजिक सञ्जाल बन्द गर्ने निर्णय गरेको हो। सर्वोच्च अदालतले पनि बुधबार एक परमादेश जारी गर्दै सामाजिक सञ्जाल तथा ओटिटी प्लेटफर्महरू नेपालमा दर्ता नभए बन्द गर्न भनेको थियो।
