सामाजिक सञ्जाल बन्द गर्ने सरकारको सूचनामा के छ?
-
बिशाल यादब
- today१९ भदौ २०८२
काठमाडौँ- सरकारले नेपालमा दर्ता भएका सामाजिक सञ्जाल निष्क्रिय गर्न नेपाल दूरसञ्चार प्राधिकरणलाई पत्र पठाएको छ।
सूचना तथा सञ्चार मन्त्रालयमा बिहीबार बसेको बैठकले नेपालमा दर्ता नभएका २६ सामाजिक सञ्जाल बन्द गर्ने निर्णय गरेको हो।
मन्त्रालयले बन्द गर्न दूरसञ्चार प्राधिकरणलाई निर्देशन दिइसकेको र चाँडै यसको कार्यान्वयन हुने बुझिएको छ।
सञ्चार मन्त्रालयले सूचनामा लेखेको छ- सम्मानित सर्वोच्च अदालतको बृहत पूर्ण इजलासले अदालतको अवहेलनासम्बन्धी मुद्दा (मुद्दा नं. ०८०-CF-००१२) मा स्वदेशी वा विदेशी उत्पत्तिका अनलाइन तथा सामाजिक सञ्जाल प्लेटफर्महरूलाई सञ्चालन पूर्व अनिवार्य रूपमा सम्बन्धित साधिकार निकायबाट सूचीकरण गरी अनिच्छित सामाग्रीहरुको मूल्याङ्कन र अनुगमन गर्न नेपाल सरकारको नाममा निर्देशनात्मक आदेश दिएको छ।
सीमाभित्र सूचीकरण हुन नआएका सामाजिक सञ्जालहरूलाई नेपालमा निष्क्रिय गराउन र सूचीकरण गरेमा सोही क्षणदेखि सक्रिय गराउन पनि सञ्चार मन्त्रालयले भनेको छ।
सूचनामा भनिएको छ- उक्त आदेश परिपालनाका लागि मिति २०८२।०५।०९ मा नेपाल सरकार (मन्त्रिपरिषद्) बाट भएको निर्णयानुसार सञ्चार तथा सूचना प्रविधि मन्त्रालयले ‘सामाजिक सञ्जालको प्रयोगलाई व्यवस्थित गर्ने निर्देशिका, २०८०’ बमोजिम सात (७) दिनको म्याद दिई सामाजिक सञ्जाल प्लेटफर्महरुलाई सूचीकरण गर्नका लागि मिति २०८२ । ०५ । १२ मा सार्वजनिक सूचना प्रकाशन गरिएकोमा तोकिएको समय सिमा भित्र सूचीकरणका लागि मन्त्रालयमा सम्पर्क गर्न नआएका सामाजिक सञ्जाल प्लेटफर्महरूलाई नेपालभित्र निष्क्रिय गराउन र सूचीकरण गरेमा सोही क्षणदेखि पुनः सक्रिय गराउन नेपाल दूरसञ्चार प्राधिकरणलाई निर्देशन दिइएको व्यहोरा सवै सरोकारवालालाई जानकारी गराइन्छ ।
