थुनामुक्त गर्न अस्वीकार गर्ने जिल्लाको आदेशबिरुद्ध लामिछानेद्वारा उच्च अदालतमा फेरि निवेदन
-
बिशाल यादब
- today९ भदौ २०८२
काठमाडौँ- धरौटी रकम बुझाएर छाड्न दिएको निवेदन रुपन्देही जिल्ला अदालतले अस्वीकार गरेपछि राष्ट्रिय स्वतन्त्र पार्टी (रास्वपा) का सभापति तथा पूर्वउपप्रधानमन्त्री रवि लामिछानेले उच्च अदालत तुलसीपुरको बुटवल इजलासमा यसबिरुद्ध निवेदन दिएका छन्।
सुप्रिम बचत तथा ऋण सहकारीको ठगी प्रकरणमा लामिछानेले आफ्नो दायित्वमा पर्ने २ करोड ७४ लाख ८४ हजार रुपैयाँ बराबरको धरौटी रकम बुझाएर छाड्न माग गर्दै दिएको निवेदन जिल्ला अदालत रूपन्देहीले बदर गरेको थियो।
उच्च अदालत बुटवल इजलासका सूचना अधिकारी रामबहादुर कुँवरले लामिछानेको निवेदन दर्ता भएको जानकारी दिएका छन्।
गत साउन २६ गते रुपन्देही जिल्ला अदालतका न्यायाधीश नारायणप्रसाद सापकोटाको इजलासले रवि लामिछानेले बुझाएको बिगो रकम यकिन भइनसकेको भन्दै उनको निवेदन अस्वीकार गरेको थियो।
लामिछानेले थुनामुक्त गर्न माग गरी गत साउन १९ गते जिल्ला अदालतमा बैंक ग्यारेन्टीसहित निवेदन दिएका थिए।
सुप्रिम बचत तथा ऋण सहकारीबाट भएको अपचलनको मुद्दामा लामिछानेलाई पुर्पक्षका लागि थुनामा पठाइएको थियो।
