माधव–झलनाथबीच फेरि घम्साघम्सी
-
मेराज हास्मी
- today३ भदौ २०८२
काठमाडौँ । भद्र सहमतिको एकसाता नपुग्दै नेकपा एसका नेताद्वय माधव नेपाल र झलनाथ खनालबीच समानन्तर कमितिमार्फत संघर्ष सुरु भएको छ । अध्यक्षसमेत रहेका माधव नेपाल र सम्मानीत नेता झलनाथबीच लामो समयससम्म भनाभन चलेपछि साउन २६ गते पार्टी केन्द्रीय कार्यालयमा एक अर्काविरुद्ध भविष्यमा कुनै आरोप प्रत्यारोप नगर्ने भनेर भद्र सहमति भएको थियो । यसपछि दुई नेताबीचको सम्बन्धमा सुधार हुने अपेक्षा पार्टी नेताहरुले गरेका थिए । यद्यपि माधव र झलनाथले पुनः पार्टी निकट युवा संघमा समानान्तर कमिटी गठन गरेर संघर्षमा उत्रिएका छन् ।
आईतबार पार्टीका वरिष्ठ उपाध्यक्ष राजेन्द्र पाण्डेले अध्यक्ष माधवकुमार नेपाल पक्षको नवौं महाधिवेशन आयोजक कमिटीका पदाधिकारी र सदस्यलाई शपथ गराएका थिए । तर सोही दिन झलनाथ पक्ष पनि युवा संघको समानान्तर कमिटी गठन गरेर चुनौतीमा उत्रिएको हो । झलनाथ पक्षको २२१ सदस्यीय समानन्तर कमिटिको नेतृत्व सञ्जीव राईले गरेका छन् । झलनाथ पक्षले पत्रकार सम्मेलन नै गरेर माधव पक्षधरबाट एकलौटी पेलिएपछि आफूहरु समानान्तर कमिटी गठन गर्न बाध्य भएको उल्लेख गरेको छ ।
सानो दलमा ठूलो विवाद !
निरन्तरको विवादले माधव नेपाल नेतृत्वको नेकपा (एकीकृत समाजवादी) सानो दल तर ठूलो विवादको उदाहारणको रुपमा पेश भइरहेको छ । एमालेबाट विभाजित भएर बनेको पार्टी हुर्कनै नपाइ सँधै आन्तरिक विवाद र कलहका कारण झनै दलदलमा फसेपछि उक्त भाष्य खडा भएको हो । मुख्यतः यो पार्टीका नेताहरु नीतिगत र भावी रणनीतिमै एकमत देखिँदैनन् । पार्टी अध्यक्ष माधव नेपाल जनताको बहुदलीय जनवादको पक्षमै छ भने पार्टीका सम्मानित नेता झलनाथ खनाल अब जबजको औचित्य नै समाप्त भएको भन्दै पार्टीलाई नयाँ सिराबाट अघि बढाउनुपर्ने पक्षमा छन् ।
यस्तै नीतिगत र सिद्धान्ततः मत भिन्नता हुँदा नेकपा एसमा शीर्ष तहमै बेमेलता देखिँदै आएका छन् । पछिल्लो परिघटना हेर्ने हो भनेपनि माधव र झलनाथबीचको असामान्य आरोप प्रत्यारोपले पार्टी नै विभाजनको संघारमा पुग्यो । पार्टी विभाजनको औचित्य पुष्टि गर्न नसकेको भनेर माधवले झलनाथमाथि प्रश्न उठाएपछि दुई नेताबीच लामै जुहारी चलेको थियो । उनीहरुले एकअर्कालाई पार्टी छाडेर जानसम्म भन्न भ्याएका थिए । तर दोस्रो तहका नेताहरुको रोहबरमा साउन २६ गते दुई नेताबीच भद्र सहमती गराइएपछि झलनाथ र माधबबीचको विवाद साम्य हुने अपेक्षा गरिएको थियो । यद्यपि माधव–झलनाथबीचको राजनीतिक संघर्ष अझै मत्थर हुन सकेको देखिँदैन ।
गौतम र झाँक्री भने चुप !
नेकपा एकीकृत समाजवादीमा भर्खरै समाहित भएका नेता वामदेव गौतम नेतृत्वले उपयुक्त जिम्मेवारी नदिए पार्टीमा धेरै रहन नसकिने भन्दै चेतावनी दिइरहेका थिए । तर संगठन विभाग प्रमुख खोजिरहेका वामदेवलाई श्रावण ३० गते बसेको नेकपा एसको सचिवालय बैठकले पार्टीमा तेस्रो वरियतासँगै वरिष्ठ नेताको जिम्मेवारी दिएको छ । नेकपा एकता राष्ट्रिय अभियानबाट आएका अन्य तीन जनालाई पोलिटब्युरो सदस्य तथा ९ जनालाई केन्द्रिय सदस्य बनाउने निर्णय नेकपा एसले गरेको छ ।
यो जिम्मवारी बाँडफाँटपछि भने वामदेव नेतृत्वप्रति सकारात्मक बनेका छन् । अर्कोतर्फ नेकपा एस समाजवादी मोर्चालाई सक्रिय बनाउने लयमा लागेको छ भने माओवादीसँगको एकताका लागि पनि गृहकार्यमा जुटेको छ । त्यस्तै नेतृत्वमाथि आक्रामक बन्दै आएकी अर्की नेतृ रामकुमारी झाँक्री पनि पछिल्लो दिनमा शान्त भएकी छन् ।
यअघि झाँक्री पार्टी नेतृत्वमाथि गम्भीर प्रश्न उठाउँदै अर्ली अधिवेशन गराउन र नेतृत्व परिवर्तन गर्न चर्को दबाब दिँदै आएकी थिइन् । तर उक्त अभिव्यक्तिप्रति पार्टीले नै स्पष्टिकरण माग गरेपछि झाँक्रीले पनि आत्मआलोचना गर्दै भावी दिनमा त्यस्तो अभिव्यक्ति नदोहोर्याउने प्रतिबद्धता व्यक्तm गरेकी छन् । योसँगै पार्टीमा वामदेव र झाँक्रीको विवाद समाधानउन्मुख भएको देखिन्छ । तर अर्कोतर्फ सञ्जिव राई नेतृत्वमा युवा संघको समानान्तर कमिटी गठन भएपछि भने पार्टीमा झलनाथ र माधवबीचको टसल अझै नरोकिएको स्पष्ट देखिएको छ ।
