एमाले बागमतीका अधिकांश सदस्यहरू विद्या भण्डारीका पक्षमा
-
बिशाल यादब
- today२९ श्रावण २०८२
काठमाडौं- पूर्वराष्ट्रपति विद्यादेवी भण्डारीलाई पार्टी सदस्यताबाट रोक्ने एमाले केन्द्रीय समितिको निर्णयप्रति एमाले बागमती प्रदेशका अधिकांश सदस्यहरूले फरक मत राखेका छन्।
नेकपा एमालेले विधान महाधिवेशनमा प्रस्तुत हुने प्रतिवेदनहरुमाथि सुझाव संकलन गरिरहँदा यसबारे बागमती प्रदेश कमिटीमा भएको छलफलका क्रममा अधिकांश सदस्यहरूले अध्यक्ष केपी शर्मा ओलीको निर्देशनमा एमाले केन्द्रीय कमिटीले गरेको विद्या भण्डारीलाई रोक्ने निर्णयप्रति असहमति प्रकट गरेका छन्।
अध्यक्ष ओलीले आगामी १० भदौसम्म सुझाव पठाउने डेडलाइन तोकेका छन्।
सोमबार बागमती प्रदेश कमिटीले सचिवालय बैठक राखेर सुझाव संकलन प्रक्रिया अगाडि बढाउँदा पूर्वराष्ट्रपति भण्डारीको पार्टी सदस्यता नवीकरण नगर्ने निर्णयप्रति बहुमत सदस्यले असन्तुष्टि जनाएको एक सहभागीले बताएका छन्। एकजना सदस्यले मात्र केन्द्रीय कमिटीको निर्णय सही भएको बताएका थिए भने बाँकी सदस्यहरूले भण्डारीको पक्षमा राय दिएका थिए।
अधिकांश सचिवालय सदस्यले भण्डारीबारे भएको पार्टी निर्णयमा पुनर्विचार गर्न सुझाव दिएका थिए।
