मुलुक अस्थिरता तर्फ धकेल्ने षड्यन्त्र तीव्र, तर सफल हुन सक्दैन : मन्त्री गुप्ता
-
बिराज यादव
- today२९ चैत्र २०८१
वीरगन्ज, पर्सा — संघीय मामिला तथा सामान्य प्रशासन मन्त्री तथा नेकपा एमाले केन्द्रीय सदस्य राजकुमार गुप्ताले मुलुकलाई अस्थिरता तर्फ लैजान नियोजित षड्यन्त्रहरू भइरहेको बताएका छन्। वीरगन्ज महानगरपालिका नगर कमिटीको दोस्रो अधिवेशन उद्घाटन गर्दै मन्त्री गुप्ताले राजावादी नाममा काठमाडौंमा आयोजना गरिएका गतिविधिहरूको आडमा मुलुक अस्थिर बनाउन खोजिएको आरोप लगाए।
“देशले स्थायित्वको बाटो लिएको बेला विघटनकारी शक्तिहरू सक्रिय हुन थालेका छन्,” मन्त्री गुप्ताले भने, “तर जतिसुकै षड्यन्त्र भए पनि मुलुक अस्थिर हुने छैन।” उनले वर्तमान गठबन्धन सरकारलाई स्थिरता र सुशासनका लागि दुई प्रमुख शक्तिको साझा प्रयासको रूपमा व्याख्या गर्दै, अबको बाटो समृद्धिको हुने बताए। “मुलुकलाई सही दिशामा लैजान एमाले निर्णायक शक्ति बन्नैपर्छ,” उनले जोड दिए।
आगामी २०८४ को निर्वाचनमा एमालेले बहुमत ल्याएर निर्णायक राष्ट्रिय शक्तिका रूपमा स्थापित हुने दावी गर्दै गुप्ताले भने, “जहिलेसम्म एमाले निर्णायक शक्ति बन्दैन, राष्ट्रियताको मुद्दा समाधान हुँदैन, स्वाभिमानको मुद्दा उठ्दैन।” मन्त्री गुप्ताले पार्टीको संगठन बलियो बनाउनुको आवश्यकता औंल्याउँदै, बिरगंज महानगरपालिकाका ३२ वटै वडामा जित सुनिश्चित गर्न कार्यकर्तालाई निर्देशनसमेत दिए।
“मिशन ८४ सफल पार्न अहिलेको राजनीतिक समीकरण सकारात्मक कदम हो,” भन्दै उनले एमाले कुनै मोर्चाको पक्षमा नरहेको स्पष्ट पारे। निष्कर्षतः, मन्त्री गुप्ताले देशभक्त जनतालाई सतर्क रहन आह्वान गर्दै मुलुकको स्थायित्व, सुशासन र समृद्धिका लागि एमाले नेतृत्व नै विकल्प भएको सन्देश दिएका छन्।
