ऊर्जामन्त्री खड्काको तुम्लिंगटार अवलोकन: कोशी कोरिडोर २२० केभी लाइनबाट जलविद्युत प्रवाह सुरु
-
अशोक यादब
- today२५ चैत्र २०८१
काठमाडौँ, चैत २५ – ऊर्जा, जलस्रोत तथा सिंचाइ मन्त्री दीपक खड्का गृहजिल्ला संखुवासभा पुगेर देशकै महत्वाकांक्षी आयोजना मध्ये एक, कोशी कोरिडोर २२० केभी डबल सर्किट प्रशारण लाइनको प्रगतिबारे स्थलगत निरीक्षण गरेका छन्।
उनले तुम्लिंगटार सवस्टेसनमा पुगेर आयोजनाको भौतिक तथा प्राविधिक पक्षको विस्तृत जानकारी लिएका हुन्। नेपाल विद्युत प्राधिकरण अन्तर्गत निर्माण सम्पन्न भइसकेको इनरुवा–बसन्तपुर–बानेश्वर–तुम्लिंगटार प्रशारण लाइनमार्फत जलविद्युत प्रवाह सुरु भइसकेको छ। यसले नेपालको ऊर्जा आपूर्ति प्रणालीमा ऐतिहासिक उपलब्धि थपेको छ।
आयोजनाका प्रमुख राघवेन्द्र झाले मन्त्रीलाई जानकारी गराउँदै भने, “यस आयोजनाको सफल कार्यान्वयनले मात्र होइन, ऊर्जाको दीर्घकालीन सुरक्षा सुनिश्चित गरेको छ।” उनले बताएअनुसार Kalpataru Projects International Limited र Larsen & Toubro Ltd. जस्ता अन्तर्राष्ट्रिय स्तरका भारतीय कम्पनीहरूले निर्माण कार्य सम्पन्न गरेका हुन्।
त्यस्तै, बसन्तपुर–धुंगेसांगु लाइन र धुंगेसांगु सवस्टेसनको कार्य KEC International Ltd. द्वारा सम्पन्न गरिएको छ। बाँकी रहेको दोस्रो सर्किट स्ट्रिङ्ग कार्य अन्तिम चरणमा रहेको र नेपाल हाइड्रो लिमिटेडद्वारा सम्पन्न हुँदै गरेको जानकारी पनि दिइएको छ। नेपाल विद्युत प्राधिकरणले आयोजनाको सञ्चालन दुहवी महाशाखाअन्तर्गत ग्रिड सञ्चालन विभागलाई जिम्मा दिइसकेको छ।
पूँजीकरण प्रक्रिया तीव्र गतिमा अगाडि बढिरहेको बताइएको छ। ऊर्जामन्त्री खड्काले भने, “यो आयोजना पूर्वी नेपालको ऊर्जा विकासमा माइलस्टोन सावित हुनेछ। औद्योगिक विस्तार, स्थानीय विकास र लोडसेडिङ न्यूनीकरणमा यसको योगदान दूरगामी हुनेछ।”
तुम्लिंगटार सवस्टेसनमा आयोजित कार्यक्रममा संखुवासभाका प्रमुख जिल्ला अधिकारी, नगरप्रमुख, वडाध्यक्ष, स्थानीय जनप्रतिनिधि तथा विद्युत प्राधिकरणका प्राविधिकहरूको उल्लेखनीय उपस्थिति थियो। यो आयोजना न केवल पूर्वी नेपालका लागि, सिङ्गो राष्ट्रकै ऊर्जागत भविष्यको उज्यालो संकेत बनेको छ।
