काठमाडौंमा तेस्रो जनआन्दोलनको प्रदर्शन भव्यरूपमा सम्पन्न – “दलाल दलतन्त्रको युग समाप्त भयो” प्रधानमन्त्रीको राजीनामाको माग, नयाँ निकासको घोषणा
-
संजय कुशवाहा
- today२४ चैत्र २०८१
काठमाडौं – दलाल दलतन्त्रविरुद्धको घोषित तेस्रो जनआन्दोलन आज काठमाडौंमा भव्यताका साथ सम्पन्न भएको छ। जनआन्दोलन दिवसको अवसरमा आम जनता पार्टी द्वारा आयोजित आन्दोलनमा देशभरिबाट आएका हजारौं जनताको उत्साहजनक सहभागिता देखिएको छ।
प्रदर्शनमा सहभागीहरुले वर्तमान राजनीतिक प्रणालीलाई "दलाल दलतन्त्र" को संज्ञा दिँदै देशलाई अराजकता, भ्रष्टाचार र निराशातर्फ धकेल्ने मुख्य कारकको रूपमा चित्रण गरे। आन्दोलनमा उठाइएको मुख्य नारामा भनिएको छ — “अबको बाटो जनशक्तिको, होइन दलतन्त्रको!” आम जनता पार्टीले प्रधानमन्त्रीलाई तत्काल राजीनामा दिन माग गर्दै चेतावनी दिएको छ कि, “अब जनताको धैर्यको सीमा नाघिसकेको छ, सत्ता नछोडे सडकबाट सत्ता पल्टाइनेछ।”
पार्टीका तर्फबाट जारी गरिएको वक्तव्यमा भनिएको छ — “आजको आन्दोलनले प्रमाणित गर्यो, जनताले अब विकल्प खोज्न थालेका छन्। दलतन्त्रको औचित्य समाप्त भइसकेको छ, नयाँ युगको सुरुवातको घडी यही हो।”
विश्लेषकहरूले यो आन्दोलनलाई नयाँ राजनीतिक ध्रुवीकरणको संकेतका रूपमा हेर्न थालेका छन्। राजधानीमा देखिएको यो लहर अब देशव्यापी आन्दोलनमा रूपान्तरण हुने सम्भावना बलियो बन्दै गएको छ।
