मन्त्री राजकुमार गुप्ताद्वारा पर्साको पोखरीयामा सडक र नालाको शिलान्यास : “इमान्दारिता भए थप बजेटको ढोका खुला”
-
बिराज यादव
- today२४ चैत्र २०८१
पर्सा, पोखरीया – संघीय मामिला तथा सामान्य प्रशासन मन्त्री तथा नेकपा एमालेका केन्द्रीय सदस्य राजकुमार गुप्ताले पर्साको पोखरीया नगरपालिका–२ लमरियामा सडक र नालाको शिलान्यास गरेका छन्। भौतिक पूर्वाधार तथा यातायात मन्त्रालयको बजेटबाट २५ लाख रुपैयाँको लागतमा बन्ने १३२ मिटर सडक र १०७ मिटर नालाको शिलान्यास गरिएको हो।
शिलान्यास कार्यक्रममा बोल्दै मन्त्री गुप्ताले सरकार तराई-मधेशका आदिवासी, जनजाति, मधेसी र सीमान्तकृत समुदायको चौतर्फी विकासमा प्रतिबद्ध रहेको बताए। उनले भने, "यो बजेट मेरो पहल र निरन्तरको प्रयासले सम्भव भएको हो। इमान्दारिता देखाए अर्को वर्ष अझै धेरै बजेट ल्याउँछु, तर काममा बेइमानी भयो भने आशा नगर्नुहोस्।" गुप्ताले विगतमा सरकारप्रति उपेक्षाको गुनासो आएको मधेशले अब विकासको गति अनुभूत गर्ने बताए।
"पहिलेजस्तो सरकारले हामीलाई हेरिरहेको छैन भन्ने गुनासो अब हट्छ। तराई-मधेशमै मेरो प्राथमिकता छ," मन्त्री गुप्ताले दाबी गरे। त्यसैगरी, उनले नेपाल–भारत सीमावर्ती क्षेत्रको तुलनामा नेपालको पक्षमा बढी विकास चाहेको उल्लेख गर्दै पोखरीयालाई औद्योगिक क्षेत्रका रूपमा विकास गर्ने योजना सरकारको कार्यसूचीमा रहेको जानकारी दिए। "यो क्षेत्रलाई औद्योगिक हब बनाउने सरकारको सोचलाई म अगाडि बढाइरहेको छु," उनले स्पष्ट पारे। कार्यक्रममा पोखरीया नगरपालिकाका मेयर प्रधुम्न चौहानले मन्त्री गुप्तासँग थप बजेटका लागि आग्रह गर्दै नगर विकासमा निरन्तरको सहयोगको अपेक्षा राखे।
मन्त्री गुप्ताले कर्मचारी व्यवस्थापनदेखि विकास आयोजनासम्म सबै तहमा सरकार गम्भीर रूपमा काम गरिरहेको बताउँदै "रातदिन काम भइरहेको छ, छिट्टै सबै तहमा कर्मचारी व्यवस्थापन पूरा हुनेछ," भन्ने विश्वास दिलाए।
