सांसद एकनाथ ढकालद्वारा प्रहरी ऐन २०८१ को स्वागत, नेपाल प्रहरीलाई दक्षिण एसियामा उत्कृष्ट बताए
-
रामाशंकर साह
- today६ फाल्गुन २०८१
काठमाडौँ, 2081 असोज – प्रतिनिधि सभाका सांसद एकनाथ ढकालले नेपाल प्रहरीसम्बन्धी नयाँ विधेयकको स्वागत गर्दै नेपाल प्रहरीलाई दक्षिण एसियाको उत्कृष्ट प्रहरी संगठनको रूपमा प्रशंसा गरेका छन्।
प्रहरी ऐन २०८१ माथि प्रतिनिधि सभामा भएको छलफलका क्रममा सांसद ढकालले विधेयकलाई कानूनी सुधारको महत्त्वपूर्ण कदमको रूपमा व्याख्या गर्दै यसको कार्यान्वयनले प्रहरी संगठनलाई व्यवस्थित, पेशेवर, जनउत्तरदायी र पारदर्शी बनाउने विश्वास व्यक्त गरे। उनले नेपाल प्रहरीको भूमिकालाई स्पष्ट पार्दै भने, “नेपाल प्रहरी अपराध अनुसन्धान तथा आन्तरिक सुरक्षाको प्रमुख निकाय हो।
बाह्य सुरक्षा नेपाली सेनाले सम्हाल्छ भने आन्तरिक सुरक्षा नेपाल प्रहरीले। यस ऐनले प्रहरी सेवालाई थप प्रभावकारी बनाउनेछ।” सांसद ढकालले नयाँ ऐनले प्रहरी संगठनलाई प्रविधिमैत्री बनाउँदै यसको कार्यक्षमतामा सुधार ल्याउने बताए।
“प्रहरी ऐन २०१२ खारेज गर्दै संघीयता र संविधान कार्यान्वयनलाई सहज बनाउन यो विधेयक महत्त्वपूर्ण हुनेछ,” उनले भने।
सांसद ढकालले प्रहरी संगठनमा राजनीतिक हस्तक्षेप रोक्न ऐनले स्पष्ट व्यवस्था गरेको भन्दै यसले प्रहरी प्रशासनलाई थप निष्पक्ष र प्रभावकारी बनाउने उल्लेख गरे। “आइजिपी नियुक्तिमा स्पष्ट व्यवस्था गरिएको छ, जसले प्रहरी संगठनलाई स्वायत्त र पेशेवर बनाउन मद्दत गर्नेछ,” उनले जोड दिए।
सांसद ढकालले प्रहरीको मनोबल उच्च राख्न, उमेर हद र अमर प्रहरी व्यवस्थापनलाई ऐनले समेट्नु स्वागतयोग्य रहेको बताए। उनले प्रहरी संगठनलाई प्रविधिसँग अपडेट गर्नुपर्ने आवश्यकता औंल्याउँदै भने, “प्रहरीलाई अत्याधुनिक प्रविधिसँग सुसज्जित गर्दै अपराध नियन्त्रणमा प्रभावकारी बनाउनुपर्छ।”
सांसद ढकालको टिप्पणीपछि प्रहरी ऐन २०८१ प्रति आम चासो बढेको छ। नयाँ ऐनले नेपाल प्रहरीको संरचना, भूमिका, र कार्यशैलीमा सुधार ल्याउने अपेक्षा गरिएको छ।
