१० वर्षमा २८,५०० मेगावाट विद्युत् उत्पादन गर्ने लक्ष्य, ठूला जलविद्युत् आयोजना तीव्र गतिमा अघि बढ्ने : ऊर्जा मन्त्री खड्का
-
मो.सगिर अलि
- today२४ माघ २०८१
काठमाडौं, २४ माघ – ऊर्जा, जलस्रोत तथा सिंचाइ मन्त्री दीपक खड्का ले आगामी १० वर्षभित्र २८,५०० मेगावाट विद्युत् उत्पादन गर्ने सरकारको महत्वाकांक्षी लक्ष्य रहेको बताएका छन्। बुधबार ऊर्जा मन्त्रालयमा कोशी प्रदेशका प्रतिनिधिसभा र राष्ट्रिय सभाका सांसदहरूसँग छलफल गर्दै मन्त्री खड्काले ठूला जलविद्युत् आयोजना तीव्र गतिमा अघि बढाउन सांसदहरूको सक्रिय भूमिका अपरिहार्य रहेको बताए।
"सरकारले विद्युत् उत्पादनलाई प्राथमिकता दिएको छ, बजार सुनिश्चित भएकाले लगानीकर्ताहरूका लागि यो क्षेत्र भरपर्दो छ," मन्त्री खड्काले भने। उनले लामो समयदेखि अल्झिएका जलविद्युत् आयोजना तीव्र गतिमा अघि बढाउने प्रतिबद्धता जनाउँदै, सरकारी लगानी भए पनि न्यून प्रतिफल दिने परियोजनाहरूको अवस्थालाई परिवर्तन गर्नुपर्नेमा जोड दिए। सांसदहरूको सुझाव : स्थानीयलाई प्रत्यक्ष लाभ पुग्ने आयोजना प्राथमिकतामा राख्नुपर्छ छलफलमा सहभागी पूर्वमन्त्री योगेश भट्टराई ले कोशी प्रदेशको समृद्धिका लागि ऊर्जा र पर्यटनलाई प्रमुख आधार बनाउनुपर्ने बताए।
उनले तमोर जलाशययुक्त आयोजना सञ्चालन गर्न लगानी जुटाउनुपर्ने सुझाव दिए। उनले पाथिभरा मन्दिरलाई विवादमा नलैजाने र केवलकार निर्माण गरेर आर्थिक समृद्धिमा टेवा पुर्याउने धारणा राखे। पूर्वमन्त्री सीता गुरुङ ले सरकारको ऊर्जा विकास मार्गचित्रलाई व्यवस्थित रूपमा कार्यान्वयन गर्नुपर्नेमा जोड दिइन्। पूर्वमन्त्री अमललाल मोदी ले सुनसरी–मोरङ सिंचाइ योजनालाई राष्ट्रिय गौरवको आयोजना का रूपमा अघि बढाउनुपर्ने बताए। उनले तराई क्षेत्रमा हरेक वर्ष आउने बाढीको दीर्घकालीन समाधान खोज्न सरकारलाई आग्रह गरे। ऊर्जा क्षेत्रमा सरकारको उच्च प्राथमिकता : राज्यमन्त्री तामाङ राज्यमन्त्री पूर्णबहादुर तामाङ ले सरकार ऊर्जा र सिंचाइ क्षेत्रलाई उच्च प्राथमिकतामा राखेर काम गरिरहेको बताए। ऊर्जा मन्त्रालयका सचिव सुरेश आचार्य ले ऊर्जा विकास योजनाहरूलाई सफल बनाउन जनप्रतिनिधिहरूको भूमिका महत्त्वपूर्ण रहेको उल्लेख गरे।
छलफलमा सांसद रामकुमार राई, सुहाङ नेम्वाङ, महेश बस्नेत, अम्बरबहादुर रायमाझी, राजेन्द्र राई, उर्मिला थेवे, हर्कमाया विक तथा राष्ट्रिय सभा सदस्य रुक्मिणी कोइरालालगायतले ऊर्जा र सिंचाइ परियोजनाहरूलाई जनताले प्रत्यक्ष अनुभूति गर्ने गरी अघि बढाउन सरकारलाई आग्रह गरे। मन्त्री खड्काले अन्य प्रदेशका सांसदहरूसँग पनि यस्तै छलफल गर्दै जाने बताएका छन्।
