मेडिकल व्यवसायी दुर्गा प्रसाईँ पक्राउ
-
बिशाल यादब
- today४ मंसिर २०८१
वीरगंज | मेडिकल व्यवसायी दुर्गा प्रसाईँलाई प्रहरीले भक्तपुरस्थित निवासबाट पक्राउ गरेको छ। केन्द्रीय अनुसन्धान ब्युरो (सिआइबी) का प्रवक्ता होविन्द्र बोगटीले साइबर अपराधको आरोपमा उनलाई पक्राउ गरिएको जानकारी दिएका छन्।
प्रसाईँले प्रधानमन्त्रीसमेत रहेका नेकपा एमालेका अध्यक्ष केपी शर्मा ओलीको ‘कम्बोडियामा लगानी’ रहेको दाबी गर्दै सार्वजनिक रूपमा अभिव्यक्ति दिएका थिए। उनले ‘ओलीको सिग्नेचर’ भन्दै एउटा कागजातसमेत सार्वजनिक गरेका थिए। तर, उक्त सिग्नेचर ओलीको नभएको र दुर्गा प्रसाईँले भ्रामक सूचना फैलाएको आरोप लगाउँदै एमालेका नेता तथा कार्यकर्ताले उनलाई पक्राउ गर्न माग गरेका थिए।
यसै विषयमा उनलाई पक्राउ गरिएको अनुमान गरिएको छ। यद्यपि, यो प्रकरणमा औपचारिक पुष्टि भइसकेको छैन।
प्रसाईँ यसअघि पनि पक्राउ परिसकेका छन्। गत असोज ६ गते साइबर ब्युरोले उनलाई भक्तपुरस्थित घरबाट पक्राउ गरेको थियो। विद्युतीय अपराधसम्बन्धी दुई वटा मुद्दामा काठमाडौँ जिल्ला अदालतले मागेको १ लाख रुपैयाँ धरौटी बुझाएर असोज १५ गते उनलाई रिहा गरेको थियो।
साइबर अपराधसम्बन्धी मुद्दाहरूमा बारम्बार विवादमा तानिँदै आएका प्रसाईँको पछिल्लो गिरफ्तारीले फेरि चर्चा पाएको छ। प्रहरीका अनुसार उनलाई आवश्यक अनुसन्धानका लागि नियन्त्रणमा लिइएको छ।
