रास्वपा सभापति लामिछाने थप अनुसन्धानका लागि रुपन्देही लगिँदै
-
बिशाल यादब
- today२७ कार्तिक २०८१
वीरगञ्ज । सहकारी ठगी र सङ्गठित अपराधमा संलग्न भएको आरोपमा कास्की प्रहरीको हिरासतमा रहेका राष्ट्रिय स्वतन्त्र पार्टीका सभापति रवि लामिछानेलाई थप अनुसन्धानका लागि रुपन्देही लगिने भएको छ। कात्तिक २ गते पोखराको सूर्य दर्शन सहकारीको रकम हिनामिनामा संलग्न रहेको आरोपमा पक्राउ परेका लामिछाने २४ दिनदेखि कास्की प्रहरीको हिरासतमा छन्।
आइतबार मात्रै कास्की जिल्ला अदालतले उनलाई थप १३ दिन हिरासतमा राख्न अनुमति दिएपछि प्रहरीको तयारीमा लामिछानेलाई रुपन्देही पठाउने निर्णय भएको हो। बुटवलस्थित सुप्रिम सहकारीको रकम हिनामिनामा समेत संलग्न रहेको आरोपमा रुपन्देही जिल्ला अदालतले अनुसन्धानका लागि लामिछानेलाई पक्राउ अनुमति दिइसकेको छ।
रुपन्देही प्रहरीका अनुसार कास्की प्रहरीसँगको समन्वयमा मंगलबार भैरहवामा हवाईमार्गबाट ल्याउने योजना छ। आइतबार ल्याउने तयारी भए पनि उडान परिवर्तन भएपछि मंगलबार ल्याउन लागिएको रुपन्देही प्रहरी प्रमुख, प्रहरी उपरीक्षक रञ्जित सिंह राठौरले जानकारी दिए।
सुरक्षा व्यवस्थाका लागि रुपन्देही प्रशासनले दुवै पक्षले गर्न सक्ने सम्भावित प्रदर्शनलाई ध्यानमा राखी आवश्यक परे निषेधित क्षेत्र घोषणा र व्यापक प्रहरी परिचालनको तयारी गरेको छ।
रुपन्देही जिल्ला अदालतले सुप्रिम सहकारीको १४ करोड २९ लाख रुपियाँ गोर्खा मिडिया नेटवर्क प्रालिमा लगेर खर्च गरेको आरोपमा लामिछाने, जीवी राईसहित १२ जनालाई अनुसन्धानका लागि पक्राउ गर्न कात्तिक ८ गते अनुमति दिएको थियो। संसदीय छानबिन विशेष समिति र प्रहरीको प्रतिवेदनअनुसार सुप्रिम सहकारीबाट २ करोड लामिछानेको नाममा र १४ करोड २९ लाख अन्य व्यक्तिमार्फत गोर्खा मिडिया नेटवर्कमा खर्च गरिएको उल्लेख छ।
