मधेश प्रदेश सरकार विस्तार सोमवार हुने
-
अग्निपथ सम्बादाता
- today१४ माघ २०७९
Agnipath media - अग्निपथ मिडिया
१५ माघ, वीरगञ्ज मधेश प्रदेश सरकार सोमवार विस्तार हुने भएको छ । सत्तागठबन्धनका शीर्ष नेताहरुबीच मन्त्रालय बाँडफाँटमा सहमति भएसँगै मन्त्रिमण्डलले पूर्णता पाउने भएको छ । उच्चस्रोतका अनुसार जनता समाजवादी पार्टी(जसपा)ले मुख्यमन्त्री, अर्थ मन्त्रालय , सामाजिक विकास मन्त्रालय र उर्जा तथा खानेपानी मन्त्रालय पाएको छ । मुख्यमन्त्रीमा सरोज कुमार यादव र अर्थ मन्त्रीमा सञ्जयकुमार यादव नियुक्त भइसकेका छन् ।
स्रोतका अनुसार सामाजिक विकास मन्त्रीमा सुरिता साह र उर्जा तथा खानेपानीमा राजु गुप्ताको पक्का जस्तै छ ।सामाजिक विकास राज्यमन्त्रीमा जसपाकै प्रमोद कुमार जयसवाल रहने छन् । त्यसैगरी सत्तासाझेदार ठूला दल नेकपा एमालेले भौतिक पूर्वाधार विकास , गृह तथा सञ्चार, कानून, न्याय तथा प्रदेश मामिला र महिला, बालबालिका, युवा तथा खेलकुद मन्त्रालय पाएको छ । भौतिक पूर्वाधार विकासमा सरोज कुमार यादव पहिले नै नियुक्त भइसकेका छन् ।
स्रोतका अनुसार गृह तथा सञ्चारमा राजकुमार लेखी, कानुन, न्याय तथा प्रदेश मामिलामा शत्रुधन सिंह कोइरी र महिला, बालबालिका, युवा तथा खेलकुद मन्त्रालयमा मो.जैस आलमले जिम्मेवारी पाउने भएका छन् ।शारदा थापा भौतिक पूर्वाधार विकास मन्त्रालयमा राज्यमन्त्री रहने छिन् । गठबन्धनमा रहेका जनमत पार्टीले भूमि, व्यवस्था, कृषि तथा सहकारी र वाणिज्य आपूर्ति तथा विज्ञान प्रविधि मन्त्रालय पाएको छ । कृषिमा ईञ्जिनियर वसन्त कुशवाहा नियुक्त भइसकेका छन् ।
वाणिज्य, आपूर्ति तथा विज्ञान प्रविधि मन्त्रीको नाम टुंगो लागिसकेको छैन् ।स्रोतका अनुसार सोमवार बिहान नै जनमतबाट मन्त्रीको नाम सार्वजनिक हुनेछ । वन पर्यटन तथा उद्योग मन्त्रालय माओवादी केन्द्रको भागमा परेको छ ।माओवादी केन्द्रका नेता भरत साहलाई सो मन्त्रालयको जिम्मेवारी दिइनेछ ।तर राज्यमन्त्रीको टुंगो लाग्न बाँकी छ ।स्रोतका अनुसार माओवादीले दुईवटा मन्त्रालय मागेको छ ।
