वीरगञ्ज । सशस्त्र प्रहरीले मधेस प्रदेशका सीमावर्ती १ सय ४३ वडाका वडाध्यक्षहरूसँग सीमाका विविध विषयमा छलफल गरेको छ ।
बुधवार सशस्त्र प्रहरी बल नेपाल नम्बर २ छिन्नमस्ता वाहिनी मुख्यालय बर्दिबासको आयोजना र सशस्त्र प्रहरीका अतिरिक्त महानिरीक्षक वंशीराज दाहालको उपस्थितिमा भएको अन्तर संवादमा वडाध्यक्षहरूले सीमाका विभिन्न समस्या उठान गरेका छन् ।
वडाध्यक्षहरूले दुई देशको सम्बन्ध र खुला सीमामा यसअघि सहज रूपमा हुने गरेको आवागमन र दैनिक उपभोग्य बस्तुको आयातमा भारतीय एसएसबी त कतै सशस्त्र प्रहरी बलले अनाहकमा अवरोध र केरकार गरेर दुःख दिने काम गरिरहेको गुनासो गरे ।
महोत्तरीका मटिहानी नगरपालिका – ७ का वडाध्यक्ष जितनारायण माझीले पछिल्लो समय सीमामा व्यापक समस्या देखिएको गुनासो गरे। धनुषा मुखियापट्टि मुसरनिया गाउँपालिका- २ का वडाध्यक्ष नरेशप्रसाद यादवले भारतीय एसएसबीले दुःख दिएको गुनासो गर्दै आफ्नो जमिनमा अस्थायी पुल बनाउन समेत नदिएको गुनासो गरे ।
केही वडाध्यक्षले युवाहरू लागुऔषध दुर्व्यसनीमा फसेर सीमावर्ती क्षेत्रमा विकृति मौलाएकाले सीमा व्यवस्थित बनाउन आवश्यक रहेको बताए । वडाध्यक्षहरूले दुई देशबिच रहेको पौराणिक, धार्मिक र पारिवारिक सम्बन्धमा कुनै असर पर्न नहुने गरी सीमा व्यवस्थित गर्नुपर्ने बताएका थिए ।
अतिरिक्त महानिरीक्षक वंशीराज दाहाल र सशस्त्र प्रहरी बल नेपाल नम्बर २ छिन्नमस्ता वाहिनी मुख्यालयका प्रमुख दीपेन्द्र शाहले सिमानाका थप व्यवस्थित बनाउन मधेसको सिमानाकाका सबै वडाध्यक्षहरूसँग छलफल गरी सरकारलाई परामर्श सहितको प्रतिवेदन बुझाउने बताए ।
सशस्त्र प्रहरी बलका अनुसार ९ हजार ६६१ वर्ग किलोमिटर क्षेत्रफल र ६१ लाख १४ हजार जनसङ्ख्या रहेको मधेसमा ४६१ किलोमिटर लामो सीमा रहेकोमा सशस्त्र प्रहरी बलका स्थायी र अस्थायी गरी कुल १६० एकाइ सुरक्षाका लागि तैनाथ रहेको छ ।
